റിയാദ്: പ്രവാസികള്‍ക്ക് ഏറെ ആശ്വാസമേകി സഊദിയിലെ ബജറ്റ് വിമാനമായ ഫ്‌ളൈ നാസ് പുതിയ സര്‍വ്വീസുകള്‍ ആരംഭിക്കുന്നു. കരിപ്പൂരടക്കം ഇന്ത്യയിലെ ഏഴു വിമാനത്താവളത്തിലേക്കാണ് പുതിയ സര്‍വ്വീസുകള്‍ ആരംഭിക്കുന്നത്. യു.എ.ഇയുടെ ഇത്തിഹാദ് വിമാനവുമായി ചേര്‍ന്നാണ് പുതിയ സര്‍വീസുകള്‍ ആരംഭിക്കുന്നതെന്ന് നാസ് ഹോള്‍ഡിങ് കമ്പനി സി.ഇ.ഒ ബന്ദര്‍ അല്‍ മുഹന്ന പറഞ്ഞു.

കരിപ്പൂരിനെ കൂടാതെ മുംബൈ, ന്യൂ ഡല്‍ഹി, ബാംഗ്ലൂര്‍, ചെന്നൈ, ഹൈദരാബാദ്, കൊച്ചി തുടങ്ങിയ സ്ഥലങ്ങളിലേക്കാണ് പുതിയ സര്‍വ്വീസുകള്‍ ആരംഭിക്കുന്നത്. ഇവിടങ്ങളിലെക്ക് നിലവിലുള്ള ഇത്തിഹാദിന്റെ സര്‍വ്വീസുകള്‍ ഉപയോഗിച്ച് സഊദി യാത്രക്കാരെയും ഉള്‍പ്പെടുത്തുന്ന രീതിയാണ് ഫ്‌ളൈ നാസ് അവലംഭിക്കുക.

ഇവരുടെ എക്‌സ്.വൈ കോഡ് വിമാനം ഇത്തിഹാദ് വിമാനത്തിലേക്ക് കൂട്ടി ചേര്‍ത്ത് ഒരൊറ്റ സര്‍വീസയാണ് സഊദിയില്‍ നിന്നും യാത്ര തിരിക്കുക. പിന്നീട് അബുദാബി വഴി ഇത്തിഹാദ് വിമാനത്തിലായിരിക്കും യാത്ര തുടരുക. ഇന്ത്യ സഊദി യാത്രക്കാര്‍ക്കു ഏറ്റവും കുറഞ്ഞ നിരക്കില്‍ ടിക്കറ്റുകള്‍ ലഭ്യമാകുന്നത് ഏറെ ആശ്വാസകരമായിരിക്കും.

2012 ല്‍ ഇരു കമ്പനികളും തമ്മില്‍ ഉണ്ടാക്കിയ കരാര്‍ പ്രകാരമാണ് പുതിയ സര്‍വ്വീസുകള്‍ ആരംഭിക്കുന്നത്. മുപ്പതു കിലോ വരെ ബാഗേജ് സംവിധാനം നല്‍കുന്ന ഫ്‌ളൈ നാസ് സര്‍വ്വീസുകള്‍ ഉടന്‍ ആരംഭിക്കുമെന്ന് കമ്പനി അറിയിച്ചു. ഫ്‌ളൈ നാസ് ആരംഭത്തില്‍ നേരത്തെ കരിപ്പൂരിലേക്ക് നേരിട്ട് ഫ്‌ളൈ നാസ് സര്‍വ്വീസുകള്‍ ഉണ്ടായിരുന്നെങ്കിലും പിന്നീട് അത് പിന്‍വലിക്കുകയായിരുന്നു. ഏറ്റവും കുറഞ്ഞ നിരക്കില്‍ അന്ന് ടിക്കറ്റുകള്‍ നല്‍കിയിരുന്ന ഫ്‌ളൈ നാസ് ഏറെ അനുഗ്രഹമായിരുന്നു.