മുംബൈ: ബൈക്കിന് പിന്നിലിരുന്ന് യാത്ര ചെയ്തിരുന്ന വനിതാ സുഹൃത്ത് ബൈക്കിൽ നിന്ന് വീണു മരിച്ചു. യുവാവിനെതിരെ കേസ് എടുത്ത് പൊലിസ്. മുംബൈയിലെ പന്ത് നഗർ പൊലിസാണ് ചെമ്പൂർ സ്വദേശിയായ 28കാരനെ അറസ്റ്റ് ചെയ്തത്. ശനിയാഴ്ചയാണ് മനപൂർവ്വമല്ലാത്ത നരഹത്യയ്ക്ക് 28കാരൻ പിടിയിലായത്. 

വെള്ളിയാഴ്ച രാത്രി ഏഴേമുക്കാലോടെയുണ്ടായ അപകടത്തിലാണ് പൊലിസ് നടപടി. ഘാട്കോപറിലെ വിഖ്രോറി ട്രാഫിക് പൊലിസ് സ്റ്റേഷന് സമീപത്തുള്ള പാലത്തിൽ വച്ചാണ് അപകടം നടന്നത്. യുവാവും വനിതാ സുഹൃത്തും സഞ്ചരിച്ചിരുന്ന ബൈക്കിൽ മറ്റൊരു വാഹനം തട്ടിയാണ് യുവതി നിലത്ത് വീഴാനും പരിക്കേൽക്കാനും കാരണമായത്.പരിക്കേറ്റ യുവതിയെ ആശുപത്രിയിലെത്തിച്ചെങ്കിലും ചികിത്സയിലിരിക്കെ മരണത്തിന് കീഴടങ്ങുകയായിരുന്നു. 25കാരിയായ മേഘ ഷഹാനയുടെ മരണത്തിൽ അനിൽ പവാർ എന്ന പൊലിസ് കോൺസ്റ്റബിളാണ് യുവാവിനെതിരെ കേസ് എടുത്തത്. ഇർഫാൻ ഖാൻ എന്ന യുവാവാണ് അറസ്റ്റിലായത്. 

മറ്റൊരു വാഹനം തട്ടിയതിന് പിന്നാലെ മേഘ താഴെ വീഴുകയും പിന്നാലെ വന്ന വാഹനം യുവതിയുടെ ശരീരത്തിലൂടെ കയറുകയുമായിരുന്നു. ദിവ സ്വദേശിനിയാണ് യുവതി. സംഭവത്തിൽ പൊലിസ് അന്വേഷണം തുടരുകയാണ്. കോടതിയിൽ ഹാജരാക്കിയ യുവാവിനെ തിങ്കളാഴ്ച വരെ പൊലസ് കസ്റ്റഡിയിൽ വിട്ടിരിക്കുകയാണ്.