ടൊറന്റോ: യു.എസ് പ്രസിഡന്റ് തെരഞ്ഞെടുപ്പില്‍ ഡൊണാള്‍ഡ് ട്രംപിന്റെ വിജയം കുടിയേറ്റക്കാരുടെ വര്‍ധനവിന് കാരണമായേക്കുമെന്ന ജാഗ്രതയില്‍ കാനഡ. 
 യുഎസ് അതിര്‍ത്തി സൂക്ഷ്മമായി നിരീക്ഷിച്ച് വരികയാണ് കാനഡ. യുഎസ് ചരിത്രത്തിലെ ഏറ്റവും വലിയ കൂട്ട നാടുകടത്തല്‍ നടപ്പാക്കുമെന്ന ട്രംപിന്റെ പ്രഖ്യാപനമാണ് അഭയാര്‍ഥികളുടെ എണ്ണത്തില്‍ പ്രതീക്ഷിക്കുന്ന വര്‍ധനവിന് കാരണം. ന്യൂനപക്ഷ സമുദായങ്ങളില്‍ നിന്നുള്ള രേഖകളില്ലാത്ത കുടിയേറ്റക്കാര്‍ അയല്‍രാജ്യമായ കാനഡയില്‍ അഭയം തേടുമെന്നാണ് സൂചന. 

കുടിയേറ്റക്കാര്‍ നമ്മുടെ രാജ്യത്തിന്റെ രക്തത്തില്‍ വിഷം കലര്‍ത്തുകയാണെന്ന് ട്രംപ് പലപ്പോഴും തന്റെ പ്രചാരണത്തിനിടെ പറഞ്ഞിരുന്നു.

'ഞങ്ങള്‍ അതീവ ജാഗ്രതയിലാണ്. ഞങ്ങളുടെ എല്ലാ കണ്ണുകളും അതിര്‍ത്തിയിലേക്ക് നോക്കുകയാണ്. എന്താണ് സംഭവിക്കാന്‍ പോകുന്നതെന്ന് കാണാന്‍. കാരണം കുടിയേറ്റത്തെ കുറിച്ചുള്ള ട്രംപിന്റെ നിലപാട് കാനഡയിലേക്കുള്ള നിയമവിരുദ്ധവും ക്രമരഹിതവുമായ കുടിയേറ്റത്തിന് കാരണമാകുമെന്ന് ഞങ്ങള്‍ക്കറിയാം''  കനേഡിയന്‍ മൗണ്ടഡ് പൊലിസ് വക്താവ്, സര്‍ജന്റ് ചാള്‍സ് വാര്‍ത്താ ഏജന്‍സിയോട് പറഞ്ഞു. അതിനിടെ കാനഡ ഉപപ്രധാനമന്ത്രി നിലവിലെ പ്രശ്‌നങ്ങളും സാധ്യതകളും ചര്‍ച്ച ചെയ്യാന്‍ ചുമതലപ്പെട്ട മന്ത്രിമാരുമായി കൂടിക്കാഴ്ച നടത്തി.

ട്രംപിന്റെ ആദ്യ ഭരണകാലത്തും കാനഡയിലേക്ക് വന്‍ കുടിയേറ്റം നടന്നിരുന്നു. യു.എസ് സംരക്ഷണം നഷ്ടപ്പെട്ട ഹെയ്തിക്കാര്‍ ഉള്‍പ്പെടെ പതിനായിരക്കണക്കിന് കുടിയേറ്റക്കാരാണ് 2017 മുതല്‍ 2021 വരെയുള്ള കാലയളവില്‍  കാനഡയിലേക്ക് പലായനം ചെയ്തത്.