ന്യൂഡല്‍ഹി: കണ്ണൂര്‍ മട്ടന്നൂരിലെ യൂത്ത് കോണ്‍ഗ്രസ് നേതാവ് ശുഹൈബിനെ വെട്ടിക്കൊന്ന കേസിലും കോഴിക്കോട് കോടഞ്ചേരിയില്‍ ഗര്‍ഭിണിയായ ജ്യോത്സ്‌ന ആക്രമിക്കപ്പെട്ട സംഭവത്തിലും ദേശീയ ന്യൂനപക്ഷ കമ്മിഷന്‍ ഇടപെട്ടു. രണ്ടു കേസിലും സംസ്ഥാന സര്‍ക്കാരില്‍ നിന്നും പൊലിസില്‍ നിന്നും കമ്മിഷന്‍ അടിയന്തര വിശദീകരണം തേടി. രണ്ടുസംഭവങ്ങളിലും ഇതുവരെ സ്വീകരിച്ച നടപടികള്‍ വിശദീകരിക്കാന്‍ ആവശ്യപ്പെട്ട് ഡി.ജി.പി ലോക്‌നാഥ് ബെഹ്‌റ, ചീഫ് സെക്രട്ടറി, കണ്ണൂര്‍ - കോഴിക്കോട് ജില്ലാ കലക്ടര്‍മാര്‍, എസ്.പിമാര്‍ എന്നിവര്‍ക്ക് ന്യൂനപക്ഷ കമ്മിഷന്‍ കത്തയച്ചു. കണ്ണൂരില്‍ ശുഹൈബ് കൊല ചയ്യപ്പെട്ട വിധം അതിക്രൂരമാണെന്നും അതിനാലാണ് അടിയന്തരമായി ഇടപെടാന്‍ തീരുമാനിച്ചതെന്നും ന്യൂനപക്ഷ കമ്മിഷന്‍ വൈസ് ചെയര്‍മാന്‍ ജോര്‍ജ് കുര്യന്‍ പറഞ്ഞു. കോടഞ്ചേരിയില്‍ നാലരമാസം ഗര്‍ഭിണിയായിരുന്ന ജ്യോത്സനയ്ക്ക് അക്രമണത്തില്‍ പരുക്കേല്‍ക്കുകയും ഗര്‍ഭസ്ഥശിശു മരിക്കുകയും ചെയ്തിരുന്നു.
അതേസമയം, ശുഹൈബ് വധത്തില്‍ പ്രതിഷേധിച്ച് ഇന്നലെ ഡല്‍ഹിയിലെ സി.പി.എം ആസ്ഥാനമായ എ.കെ.ജി ഭവനിലേക്ക് കോണ്‍ഗ്രസ് പ്രവര്‍ത്തകര്‍ പ്രതിഷേധപ്രകടനം നടത്തി.