നാദാപുരം: വേനല്‍ച്ചൂട് ശക്തമാകുന്നതോടെ തീപിടിത്തവും കൂടുന്നു. ഒരാഴ്ചക്കുള്ളില്‍ നാദാപുരം മേഖലയിലെ മലയോരങ്ങളില്‍ ഉള്‍പ്പെടെ നിരവധി തീപിടിത്തമാണ് റിപ്പോര്‍ട്ട് ചെയ്യപ്പെട്ടത്. ഇന്നലെ ഉച്ചയോടെ യാണ് നാദാപുരം പോസ്റ്റാഫിസിന്റെ നിര്‍ദ്ദിഷ്ട ഭൂമിയില്‍ കൂട്ടിയിട്ട മാലിന്യക്കൂമ്പാരത്തിന് തീപിടിച്ചത്.
ഉച്ചവെയിലിന്റെ തീവ്രതയില്‍ ആളിക്കത്തിയ തീ സമീപത്തെ വ്യാപാര സ്ഥാപനങ്ങള്‍ക്ക് ഭീഷണിയായതോടെ പൊലിസും ഫയര്‍ഫോഴ്‌സും സ്ഥലത്തെത്തി അണച്ചു. വെള്ളിയാഴ്ച തൊട്ടടുത്ത കലാച്ചിയിലെ മാലിന്യക്കൂമ്പാരത്തിന് തീപിടിച്ചുïായ അപകടവും ഫയര്‍ ഫോഴ്‌സ് ഉദ്യോഗസ്ഥര്‍ എത്തി അണച്ചിരുന്നു. വിലങ്ങാട് മലയോരത്തെ നെടുംപറമ്പ് , കല്ലുനിര, ചുഴലി എന്നിവിടങ്ങളിലും അടിക്കാടിനു തീപിടിച്ച് വന്‍ നാശം നേരിട്ടിരുന്നു. ചപ്പുചവറുകള്‍ക്കു മുകളില്‍ അശ്രദ്ധമായി വലിച്ചെറിയുന്ന തീപ്പൊരികളാണ് ആളിക്കത്തുന്ന തരത്തിലേക്ക് മാറുന്നതെന്ന് ഫയര്‍ ഫോഴ്‌സ് ഉദ്യോഗസ്ഥര്‍ പറഞ്ഞു. ഇതേ തുടര്‍ന്ന് അലസമായി നിക്ഷേപിക്കുന്ന മാലിന്യക്കൂമ്പാരങ്ങള്‍ ടൗണുകളില്‍ ഭീഷണിയായി മാറുകയാണ്.