ജിദ്ദ: സൂഖ് ഉക്കാദ് മേളയോടനുബന്ധിച്ച് നടത്തുന്ന വിവിധ മത്സരങ്ങളിലെ വിജയികള്‍ക്ക് 2.5 ദശലക്ഷം റിയാലിന്റെ സമ്മാനങ്ങള്‍.
ജൂണില്‍ നടക്കാന്‍ പോകുന്ന 12-ാമത് സൂഖ് ഉക്കാദ് മേളയിലെ വിവിധ മത്സരവിജയികള്‍ക്കാണ് ഇത്രയും സംഖ്യ പാരിതോഷികമായി ടൂറിസം വകുപ്പ് വകയിരുത്തിയിരിക്കുന്നത്. സമ്മാനങ്ങള്‍ക്കും മത്സരപരിപാടികള്‍ക്കും ടൂറിസം പുരാവസ്തു ജനറല്‍ അതോറിറ്റി മേധാവി അമീര്‍ സുല്‍ത്താന്‍ ബിന്‍ സല്‍മാന്‍ അംഗീകാരം നല്‍കി.
അറബ് നാടുകളിലെ തിരഞ്ഞെടുക്കപ്പെടുന്ന കവികള്‍, സാഹിത്യകാരന്മാര്‍, ചിത്രകലാകാരന്മാര്‍, കാലിഗ്രഫി വിദഗ്ധര്‍, വൈജ്ഞാനിക രംഗത്ത് പുതിയ കണ്ടുപിടിത്തം നടത്തുന്നവര്‍, ഫോട്ടോഗ്രാഫര്‍മാര്‍, പ്രാസംഗികര്‍ തുടങ്ങിയവരെയാണ് ഇത്രയും സമ്മാനത്തുക കാത്തിരിക്കുന്നത്. സാഹിത്യം, കല, സാമൂഹ്യ ശാസ്ത്രം ഇനങ്ങളില്‍ 15ഓളം സമ്മാനങ്ങളാണ് ഒരുക്കുന്നത്.
മുന്‍വര്‍ഷങ്ങളില്‍നിന്നു വ്യത്യസ്തമായി സൂക്ക് ഉക്കാദ് ഷോര്‍ട്ട് ഫിലിം അവാര്‍ഡ്, ലിറ്റററി അവാര്‍ഡ് എന്നീ പേരുകളില്‍ പുതിയ സമ്മാനങ്ങളുമുണ്ട്.
ഏപ്രില്‍ ഒന്നുമുതലാണ് മത്സരാര്‍ഥികളില്‍നിന്ന് അപേക്ഷ സ്വീകരിച്ചു തുടങ്ങുക. ജൂണ്‍ 27ന് ആരംഭിക്കുന്ന മേള 17 ദിവസം നീണ്ടുനില്‍ക്കും.