പാരിസ്: ഫ്രഞ്ച് ലീഗ് വണില്‍ പാരിസ് സെന്റ് ജെര്‍മെയ്ന്‍ മുന്നേറ്റം തുടരുന്നു. സ്വന്തം തട്ടകത്തില്‍ നടന്ന പോരാട്ടത്തില്‍ അവര്‍ 5-2ന് സ്ട്രാസ്ബര്‍ഗിനെ തകര്‍ത്തു.
ഒരു ഗോളിന് പിന്നില്‍ നിന്ന ശേഷം ആദ്യ പകുതിയില്‍ മൂന്നും രണ്ടാം പകുതിയില്‍ രണ്ടും ഗോളുകളാണ് പി.എസ്.ജി എതിരാളിയുടെ വലയില്‍ നിക്ഷേപിച്ചത്. എഡിന്‍സന്‍ കവാനി ഇരട്ട ഗോളുകളുമായി കളം നിറഞ്ഞപ്പോള്‍ നെയ്മര്‍, ഡ്രാക്‌സ്‌ലര്‍, ഡി മരിയ എന്നിവര്‍ ശേഷിച്ച ഗോളുകള്‍ നേടി. മറ്റൊരു മത്സരത്തില്‍ നീസും നാന്റെസും ഓരോ ഗോള്‍ വീതം നേടി സമനിലയില്‍ പിരിഞ്ഞു.

യുവന്റസ്, നാപോളി മുന്നോട്ട്
മിലാന്‍: ഇറ്റാലിയന്‍ സീരി എ പോരാട്ടത്തില്‍ യുവന്റസ്, നാപോളി ടീമുകള്‍ വിജയം സ്വന്തമാക്കിയപ്പോള്‍ ഇന്റര്‍ മിലാനെ ജെനോവ അട്ടിമറിച്ചു. യുവന്റസ് 1-0ത്തിന് ടൊറിനോയേയും നാപോളി ഇതേ സ്‌കോറിന് എസ്.പി.എ.എല്ലിനേയും വീഴ്ത്തി. ഇന്റര്‍ മിലാനെ ജനോവ സ്വന്തം തട്ടകത്തില്‍ 2-0ത്തിനാണ് അട്ടിമറിച്ചത്. മറ്റൊരു മത്സരത്തില്‍ ബെനവെന്റോ 3-2ന് ക്രോടോണിനെ പരാജയപ്പെടുത്തി.

ഷാല്‍കെ, സ്റ്റുട്ട്ഗര്‍ട് വിജയിച്ചു
മ്യൂണിക്ക്: ജര്‍മന്‍ ബുണ്ടസ് ലീഗ പോരാട്ടത്തില്‍ സ്റ്റുട്ട്ഗര്‍ടിന് വിജയം. മറുപടിയില്ലാത്ത ഒറ്റ ഗോളിന് അവര്‍ ഓഗ്‌സ്ബര്‍ഗിനെ പരാജയപ്പെടുത്തി. മറ്റൊരു മത്സരത്തില്‍ ഷാല്‍കെ സ്വന്തം തട്ടകത്തില്‍ 2-1ന് ഹോഫെന്‍ഹെയിമിനെ വീഴ്ത്തി.