ദോഹ: ഖത്തര്‍ ടോട്ടല്‍ ഓപണ്‍ ടെന്നീസ് വനിതാ കിരീടം ചെക്ക് റിപ്പബ്ലിക്കിന്റെ 16ാം സീഡ് പെട്ര ക്വിറ്റോവയ്ക്ക്. ഖലീഫ രാജ്യാന്തര ടെന്നീസ് ആന്‍ഡ് സ്‌ക്വാഷ് കോംപ്ലക്‌സിലെ സെന്റര്‍ കോര്‍ട്ടില്‍ നടന്ന മത്സരത്തില്‍ ലോക നാലാം റാങ്ക് താരം സ്‌പെയിനിന്റെ ഗാര്‍ബിനെ മുഗുരുസയെ മൂന്ന് സെറ്റ് നീണ്ട പോരാട്ടത്തില്‍ കീഴടക്കിയാണ് ക്വിറ്റോവയുടെ നേട്ടം. സ്‌കോര്‍: 3-6, 6-3, 6-4. മത്സരം രണ്ടു മണിക്കൂറും പതിനെട്ട് മിനുട്ടും നീണ്ടു. ഡബിള്‍സ് കിരീടം ലാത്വിയയുടെ യെലേന ഒസ്റ്റപെന്‍കോ കാനഡയുടെ ഗാബ്രിയേല ഡാബ്രോവ്‌സ്‌കി സഖ്യം സ്വന്തമാക്കി. ഫൈനലില്‍ സ്ലോവാനിയയുടെ ആന്ദ്രെജ ക്ലെപാക് സ്‌പെയിനിന്റെ മരിയ ജോസ് മാര്‍ട്ടിനെസ് സാഞ്ചസ് സഖ്യത്തെ നേരിട്ടുള്ള സെറ്റുകള്‍ക്ക് തകര്‍ത്താണ് ഒസ്റ്റപെന്‍കോ- ഡാബ്രോവ്‌സ്‌കി സഖ്യം കിരീടം സ്വന്തമാക്കിയത്. സ്‌കോര്‍: 6-3, 6-3.
6000 ഗോളുകള്‍
തികച്ച് റയല്‍ മാഡ്രിഡ്
മാഡ്രിഡ്: സ്പാനിഷ് ലാ ലിഗയില്‍ 6000 ഗോളുകള്‍ നേടുന്ന ആദ്യ ടീമെന്ന റെക്കോര്‍ഡിട്ട് റയല്‍ മാഡ്രിഡ്. റയല്‍ ബെറ്റിസിനെതിരായ പോരാട്ടത്തിലാണ് മൂന്നാം ഗോള്‍ കുറിച്ച് റയല്‍ അപൂര്‍വ നേട്ടം സ്വന്തമാക്കിയത്. 6000 ഗോളെന്ന നാഴികക്കല്ലിലേക്കുള്ള ഗോള്‍ നേടാനുള്ള അപൂര്‍വ ഭാഗ്യം ലഭിച്ചത് മാര്‍ക്കോ അസെന്‍സിയോക്കായിരുന്നു.
തന്റെ രണ്ടാം ഗോളിലൂടെയാണ് താരം ക്ലബിന്റെ റെക്കോര്‍ഡ് പട്ടികയ്‌ക്കൊപ്പം തന്റെ പേരും എഴുതി ചേര്‍ത്തത്. മത്സരത്തില്‍ റയല്‍ 5-2ന് വിജയിച്ചിരുന്നു. ഇതോടെ റയലിന്റെ മൊത്തം ഗോള്‍ നേട്ടം 6002ല്‍ എത്തി.