ന്യൂഡല്‍ഹി: മെഷിന്‍ ടു മെഷിന്‍(എംടുഎം) ആശയ വിനിമയത്തിന് ഉപയോഗിക്കുന്ന മൊബൈല്‍ ഫോണുകളുടെ നമ്പര്‍ നിലവിലെ 10 അക്കത്തില്‍ നിന്ന് 13 അക്കത്തിലേക്ക് മാറ്റാന്‍ തീരുമാനം. ജൂലൈ ഒന്നുമുതല്‍ 13 അക്കത്തിലേക്ക് മാറ്റാന്‍ ഡിപ്പാര്‍ട്ട്‌മെന്റ് ഓഫ് ടെലികോം സേവന ദാതാക്കള്‍ക്ക് നിര്‍ദേശം നല്‍കിയിട്ടുണ്ട്. കാര്‍ഡ് സൈ്വപ്പിങ് മെഷിന്‍ പോലുള്ള ഒരു ഉപകരണത്തില്‍ നിന്ന് അടുത്ത ഉപകരണത്തിലേക്ക് ആശയ വിനിമയം നടത്തുന്ന സിംകാര്‍ഡുകളുടെ നമ്പറുകളാണ് 13 അക്കത്തിലേക്ക് മാറ്റാന്‍ നിര്‍ദേശം നല്‍കിയത്.
അതേസമയം മൊബൈല്‍ നമ്പര്‍ 13 അക്കത്തിലേക്ക് മാറുമെന്ന പ്രഖ്യാപനം ഉപഭോക്താക്കളെ ഞെട്ടിച്ചിരുന്നു. വാര്‍ത്ത തെറ്റിദ്ധാരണയുണ്ടാക്കിയതിനെ തുടര്‍ന്ന് നിലവില്‍ ഉപയോഗിക്കുന്ന സിം കാര്‍ഡുകളുടെ 10 അക്ക നമ്പറുകള്‍ മാറില്ലെന്ന് ടെലികോം വകുപ്പ് അറിയിച്ചു. നിലവിലെ 10 അക്ക നമ്പര്‍ ഒരു കാരണവശാലും മാറ്റാന്‍ തീരുമാനമില്ലെന്നും വകുപ്പ് അറിയിച്ചു.
സാധാരണ ഉപയോക്താക്കള്‍ സംസാരിക്കാന്‍ ഉപയോഗിക്കുന്ന സിം കാര്‍ഡുകള്‍ക്ക് പേഴ്‌സണ്‍ ടു പേഴ്‌സണ്‍(പി ടു പി) സിം കാര്‍ഡുകള്‍ എന്നാണ് പറയുന്നത്. അതുകൊണ്ടുതന്നെ പുതിയ നിര്‍ദേശം ഉപയോക്താക്കളെ ബാധിക്കുന്നതല്ലെന്നും ടെലികോം പറയുന്നു.
അതേസമയം 10 അക്ക നമ്പര്‍ പരമാവധി ഉപയോക്താക്കളില്‍ എത്തിയ സാഹചര്യത്തില്‍ നമ്പര്‍ സിസ്റ്റത്തില്‍ മാറ്റം വരാനുള്ള സാധ്യത തള്ളിക്കളയാവുന്നതല്ല. നിലവില്‍ 10 അക്ക നമ്പര്‍ തുടരുമെങ്കിലും അതിന് മുന്‍പില്‍ സംസ്ഥാന ഡിജിറ്റായോ സേവന ദാതാവിന്റെ ഡിജിറ്റായോ മൂന്നക്കം കൂടി ഭാവിയില്‍ വരാന്‍ സാധ്യതയുണ്ട്. മൊബൈല്‍ ഫോണ്‍ ഉപയോഗം ജനസംഖ്യയേക്കാള്‍ ഉയര്‍ന്ന സാഹചര്യത്തില്‍ നമ്പറുകള്‍ നല്‍കാന്‍ ഇല്ല. എന്നാല്‍ നിലവിലെ സാഹചര്യത്തില്‍ ഉപഭോക്താക്കളുടെ നമ്പര്‍ മാറ്റില്ലെന്നും അധികൃതര്‍ അറിയിച്ചു.