സിയൂള്‍: ദക്ഷിണകൊറിയയില്‍ നടക്കുന്ന ശൈത്യകാല ഒളിംപിക്‌സിന്റെ സമാപന സമ്മേളനത്തില്‍ ഉത്തരകൊറിയന്‍ ഭരണത്തില്‍ ഉന്നത പദവിയുള്ള ജനറല്‍ കിം യോങ് ചോല്‍ പങ്കെടുക്കും. ഉ.കൊറിയന്‍ രഹസ്യാന്വേഷണ മേധാവിയും ദക്ഷിണകൊറിയക്കെതിരേ നിരവധി ആക്രമണങ്ങള്‍ ആസൂത്രണം ചെയ്തയാളുമാണ് കിം യോങ് ചോല്‍.
ഇരു കൊറിയകള്‍ക്കുമിടയിലെ ബന്ധങ്ങള്‍ കൂടുതല്‍ സുദൃഢമായെന്നതാണ് കിം യോങ് ചോല്‍ ഒളിംപിക്‌സ് ചടങ്ങില്‍ പങ്കെടുക്കുന്നത് സൂചിപ്പിക്കുന്നത്. യു.എസ് പ്രസിഡന്റ് ഡൊണാള്‍ഡ് ട്രംപിന്റെ മകള്‍ ഇവാങ്ക ട്രംപാണ് സമാപന ചടങ്ങില്‍ അമേരിക്കയെ നയിക്കുന്നത്. എന്നാല്‍ ഉ.കൊറിയ-അമേരിക്ക പ്രതിനിധികള്‍ക്കിടയില്‍ ഔദ്യോഗിക കൂടിക്കാഴ്ചകളൊന്നുമുണ്ടാവില്ലെന്ന് ദ.കൊറിയന്‍ അധികൃതര്‍ പറഞ്ഞു.