ന്യൂഡല്‍ഹി: യുനൈറ്റഡ് നഴ്‌സസ് അസോസിയേഷന്‍ (യു.എന്‍.എ) പ്രഥമ ദേശീയ സമ്മേളനം ഈമാസം 25ന് ഡല്‍ഹിയിലെ ഐ.എന്‍.എ ത്യാഗരാജ ഇന്‍ഡോര്‍ സ്‌റ്റേഡിയത്തില്‍ നടക്കുമെന്നു ഭാരവാഹികള്‍ അറിയിച്ചു.
വൈകീട്ട് മൂന്നു മുതല്‍ ഏഴ്‌വരെ നടക്കുന്ന സമ്മേളനം ഡല്‍ഹി മുഖ്യമന്ത്രി അരവിന്ദ് കെജ്‌രിവാള്‍ ഉദ്ഘാടനം ചെയ്യും. 22 സംസ്ഥാനങ്ങളില്‍നിന്നുള്ള പ്രതിനിധികള്‍ പങ്കെടുക്കും.
നഴ്‌സുമാരുടെ അടിസ്ഥാന ശമ്പളം 20,000 രൂപയാക്കി ഉയര്‍ത്തണമെന്നും സ്വകാര്യ ആശുപത്രികളിലെ നഴ്‌സുമാര്‍ക്കും സര്‍ക്കാര്‍ ജീവനക്കാരുടേതിന് സമാനമായ രീതിയില്‍ ജോലി സാഹചര്യം ക്രമീകരിക്കണമെന്നുമുള്ള സുപ്രിം കോടതി വിധി നടപ്പാക്കണമെന്ന് ആവശ്യപ്പെട്ട് രാജ്യവ്യാപകമായി പ്രക്ഷോഭം നടത്താനും തീരുമാനിച്ചിട്ടുണ്ട്.