കൊല്ലം: പുനലൂരില്‍ പ്രവാസി ആത്മഹത്യ ചെയ്ത സംഭവത്തില്‍ സി.പി.ഐ, എ.ഐ.വൈ.എഫ് പ്രവര്‍ത്തകര്‍ക്കെതിരേ കേസെടുക്കും. ആത്മഹത്യ ചെയ്ത സുഗതന്റെ ബന്ധുക്കളുടെ മൊഴിയുടെ അടിസ്ഥാനത്തിലാണ് കേസെടുക്കുക. അതേ സമയം പാര്‍ട്ടിക്കാരാണ് തന്റെ പിതാവിന്റെ മരണത്തിന് പിന്നിലെന്ന് ആരോപിച്ച് സുഗതന്റെ മകന്‍ സുനില്‍ രംഗത്തെത്തി. വയല്‍ നികത്തിയ സ്ഥലത്ത് നിര്‍മിച്ച വര്‍ക്‌ഷോപ്പിനെതിരേ സമരം നടത്തിയ പാര്‍ട്ടിക്കാര്‍ തന്നെ പണം ആവശ്യപ്പെട്ടിരുന്നു. ചെറിയ തുകയായിരുന്നെങ്കില്‍ പിതാവ് നല്‍കാന്‍ തയാറായിരുന്നു. വര്‍ക്‌ഷോപ്പ് നിര്‍മാണത്തിനായി മാത്രം മൂന്ന് ലക്ഷത്തോളം രൂപ ചെലവായിരുന്നു. ഇതേ തുടര്‍ന്നുള്ള സാമ്പത്തിക പ്രതിസന്ധിക്കിടയിലാണ് പണം ആവശ്യപ്പെട്ട് എ.ഐ.വൈ.എഫ് പ്രവര്‍ത്തകരെത്തിയതെന്നും സുനില്‍ പറഞ്ഞു.
വര്‍ക് ഷോപ്പ് നിര്‍മാണത്തിനെതിരേ എ.ഐ.വൈ.എഫ് രംഗത്തെത്തിയതില്‍ മനംനൊന്താണ് ദീര്‍ഘകാലം പ്രവാസിയായിരുന്ന ഐക്കരക്കോണം ആലന്‍കീഴില്‍ സുഗതന്‍ കഴിഞ്ഞ ദിവസം ആത്മഹത്യ ചെയ്തത്. ഇന്നലെ രാവിലെ പുനലൂരില്‍ മൃതദേഹവുമായെത്തിയ ആംബുലന്‍സ് ജില്ലാ ഓട്ടോ മൊബൈല്‍ വര്‍ക്‌ഷോപ്പ് അസോസിയേഷനും നാട്ടുകാരും ചേര്‍ന്ന് തടയുകയും മൃതദേഹവുമായി റോഡ് ഉപരോധിക്കുകയും ചെയ്തു. സുഗതന്റെ മരണത്തിന് കാരണക്കാരായവര്‍ക്കെതിരേ കേസ് ചാര്‍ജ് ചെയ്ത് കസ്റ്റഡിയിലെടുക്കണമെന്നാവശ്യപ്പെട്ടായിരുന്നു ഉപരോധം.
ഡിവൈ.എസ്.പിയുടെ നേതൃത്വത്തില്‍ പൊലിസ് എത്തി കുറ്റക്കാര്‍ക്കെതിരേ കര്‍ശന നടപടിയുണ്ടാവുമെന്ന ഉറപ്പില്‍ പ്രതിഷേധക്കാര്‍ പിന്‍വാങ്ങുകയായിരുന്നു.