കുമ്പള: കാസര്‍കോട് ജില്ലയിലെ ഉപ്പളയിലും കുമ്പളയിലും വന്‍ കഞ്ചാവ് വേട്ട. 16.5 കിലോഗ്രാം കഞ്ചാവുമായി നാലുപേരെ അറസ്റ്റ് ചെയ്തു. കഞ്ചാവ് കടത്തുകയായിരുന്ന വാഹനവും പിടിച്ചെടുത്തിട്ടുണ്ട്. ജില്ലാ പൊലിസ് മേധാവി കെ.ജി സൈമണിന് ലഭിച്ച രഹസ്യവിവരത്തെ തുടര്‍ന്ന് കുമ്പള സ്റ്റേഷന്‍ ഹൗസ് ഓഫിസര്‍ പ്രേംസദനും സംഘവും നടത്തിയ പരിശോധനയിലാണ് കഞ്ചാവ് കടത്തുകയായിരുന്ന സംഘം പിടിയിലായത്. കുമ്പള ശാന്തിപ്പളത്തെ റഷീദ് എന്ന സമൂസ റഷീദ് (31), കൊടിയമ്മ പൂക്കട്ട ദണ്ഡഗോളിലെ അബ്ദുല്‍ ലത്തീഫ് എന്ന ധോണ ലത്തീഫ് (41), ഉപ്പളയിലെ മൊയ്തീന്‍ നവാസ് (31), മുത്തു എന്ന മുസ്താഖ് അഹ്മദ് (31) എന്നിവരാണ് അറസ്റ്റിലായത്.
റഷീദിനെയാണ് ആദ്യം പിടികൂടിയത്. വ്യാഴാഴ്ച വൈകിട്ട് ഏഴോടെ അരക്കിലോ കഞ്ചാവുമായി കുമ്പള ടൗണില്‍ വച്ചാണ് ഇയാള്‍ പിടിയിലാകുന്നത്. ബൈക്കില്‍ സൂക്ഷിച്ച നിലയിലായിരുന്നു കഞ്ചാവ്. ഇയാളെ വിശദമായി ചോദ്യംചെയ്തപ്പോഴാണ് കഞ്ചാവ് നല്‍കിയയാളെക്കുറിച്ച് വിവരം ലഭിച്ചത്. തുടര്‍ന്നാണ് മൊയ്തീന്‍ നവാസ് പിടിയിലായത്. ഇയാളില്‍നിന്ന് നാല് കിലോഗ്രാം കഞ്ചാവ് പിടികൂടി. തുടര്‍ന്നാണ് 12 കിലോഗ്രാം കഞ്ചാവുമായി ലത്തീഫിനെയും മുസ്താഖ് അഹ്മദിനെയും പിടികൂടിയത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.