കോട്ടയം: സി.പി.ഐയുടെ മലപ്പുറത്ത് നടന്നുവരുന്ന സംസ്ഥാന സമ്മേളനത്തില്‍ പങ്കെടുക്കുന്ന പ്രതിനിധികള്‍ക്കായി കേരളാ കോണ്‍ഗ്രസിന്റെ (എം) തുറന്നകത്ത്. ഇടതുമുന്നണി പ്രവേശനത്തിന് വിലങ്ങുതടിയാകുന്ന സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍ കേരളാ കോണ്‍ഗ്രസി(എം)നും കെ.എം മാണിക്കുമെതിരേ ഉന്നയിക്കുന്ന നിരന്തരമായ ആരോപണത്തിന് മറുപടിയായാണ് പാര്‍ട്ടി സ്റ്റിയറിങ് കമ്മിറ്റി അംഗം സ്റ്റീഫന്‍ ജോര്‍ജിന്റെ തുറന്ന കത്ത്.
സി. അച്യുതമേനോനെപ്പോലെയുള്ള മഹാരഥന്‍മാരായ ഭരണാധികാരികള്‍ നാടിന്റെ പുരോഗതിയില്‍ വഹിച്ച പങ്ക് ചരിത്രത്തിന്റെ ഭാഗമാണ്. കാനം രാജേന്ദ്രന്റെ കേരളാ കോണ്‍ഗ്രസിനെതിരായ ജല്‍പ്പനങ്ങള്‍ ഈ പാരമ്പര്യത്തെത്തന്നെ മലിനമാക്കുന്ന സാഹചര്യത്തിലാണ് കത്തെഴുതുന്നതെന്നാണ് സ്റ്റീഫന്‍ ജോര്‍ജ് പറയുന്നത്. ജനാധിപത്യസംവിധാനത്തില്‍ പരസ്പരം വിമര്‍ശിക്കാനും വിയോജിപ്പിന്റെ നിലപാടുകള്‍ സ്വീകരിക്കാനും എല്ലാവര്‍ക്കും സ്വാതന്ത്ര്യമുണ്ട്. എന്നാല്‍, കേരളാ കോണ്‍ഗ്രസ് ആലോചിച്ചിട്ടുപോലുമില്ലാത്ത എല്‍.ഡി.എഫ് പ്രവേശനമെന്ന വിഷയം അതിവൈകാരികതയോടെ കാനം ആവര്‍ത്തിക്കുന്നതിനു പിന്നില്‍ മറ്റ് അജണ്ടകളാണ്.
'കേരളാ കോണ്‍ഗ്രസ് ഫോബിയ'ബാധിച്ച് നിലവിട്ട മട്ടില്‍ തുടര്‍ച്ചയായി നടത്തുന്ന ആക്രോശങ്ങളും ജല്‍പനങ്ങളും കാനമെന്ന വ്യക്തിക്കു ചേരുമെങ്കിലും സി.പി.ഐയുടെ സെക്രട്ടറി എന്ന പദവിക്കു ചേരുമോ എന്നത് സമ്മേളന പ്രതിനിധികള്‍ ചര്‍ച്ച ചെയ്യുമെന്നു കരുതുന്നുവെന്നും കത്തില്‍ പറയുന്നു. പ്രവര്‍ത്തനപാരമ്പര്യമുള്ള എം.എല്‍.എമാരെയൊക്കെ മാറ്റിനിര്‍ത്തി കാനം പ്രതിഷ്ഠിച്ച സ്വന്തം ഗ്രൂപ്പുകാരായ നാലുമന്ത്രിമാരും കേരളം കണ്ട 'മഹാപരാജയങ്ങള്‍' ആണ് എന്നത് സി.പി.ഐ സമ്മേളനങ്ങളില്‍ത്തന്നെ ഉയര്‍ന്നുവന്ന വിമര്‍ശനമാണെന്നും കത്തില്‍ പറയുന്നു.