ന്യൂഡല്‍ഹി:ശൂന്യതയില്‍ നിന്ന് പരകോടിയിലേക്കുള്ള യാത്രയാണ് തെരഞ്ഞെടുപ്പ് ഫലങ്ങള്‍ വ്യക്തമാക്കുന്നതെന്ന് പ്രധാനമന്ത്രി നരേന്ദ്ര മോദി. വടക്കുകിഴക്കന്‍ സംസ്ഥാനങ്ങളിലെ തെരഞ്ഞെടുപ്പു ഫലങ്ങള്‍ പുറത്തുവന്നതിനു പിന്നാലെ ബി.ജെ.പി ആസ്ഥാനത്ത് പ്രവര്‍ത്തകരോട് സംസാരിക്കുകയായിരുന്നു അദ്ദേഹം. സൂര്യന്‍ അസ്തമിക്കുമ്പോള്‍ ചുവപ്പ് നിറമാണ്. എന്നാല്‍ സൂര്യന്‍ ഉദിക്കുമ്പോള്‍ അതിന് കാവി നിറമായിരിക്കും. വടക്കുകിഴക്കന്‍ സംസ്ഥാനങ്ങള്‍ വികസനത്തിന്റെ മുന്‍നിരയിലേക്ക് വരുമെന്നും അദ്ദേഹം വ്യക്തമാക്കി. ത്രിപുരയില്‍ തെരഞ്ഞെടുക്കപ്പെട്ടവര്‍ ചെറുപ്പക്കാരാണ്. ജനങ്ങളുടെ വിശ്വാസ്യത നേടുന്നതില്‍ ഈ സ്ഥാനാര്‍ഥികള്‍ വിജയിച്ചുവെന്നതാണ് അവരുടെ വിജയം വ്യക്തമാക്കുന്നതെന്നും മോദി പറഞ്ഞു.