നിലമ്പൂര്‍: കൃഷി ഭവനു കീഴില്‍ വാങ്ങിയ ലക്ഷങ്ങള്‍ വിലമതിക്കുന്ന യന്ത്രങ്ങള്‍ തുരുമ്പെടുത്ത് നശിക്കുന്നു. ഇവ പ്രവര്‍ത്തനക്ഷമമാക്കുന്നതിനുള്ള നടപടികള്‍ എടുത്തുവരികയാണെന്ന് അധികൃതര്‍ പറയുമ്പോഴും ട്രാക്ടര്‍ ഉള്‍പ്പെടെ കൃഷിക്കാര്‍ക്ക് ഉപകരിക്കുന്ന യന്ത്രങ്ങളാണ് വര്‍ഷങ്ങളായി മഴയും വെയിലുമേറ്റ് കിടക്കുന്നത്.
ട്രാക്ടറിനു പുറമേ നടീല്‍ യന്ത്രം, കാടുവെട്ടുയന്ത്രം, ഗാര്‍ഡന്‍ ട്രില്ലര്‍ എന്നിവ വിവിധ പാടശേഖര സമിതികള്‍ക്കായാണ് വകുപ്പിനു കീഴില്‍ വാങ്ങിയിരുന്നത്. ചെറിയ തകരാറുകള്‍ കാരണം പ്രവര്‍ത്തിക്കാനാകാത്തതോടെ ഇവ മാറ്റിയിടുകയായിരുന്നു. തകരാറിലായ യന്ത്രങ്ങള്‍ കൃഷി ഭവന്‍ സ്ഥിതി ചെയ്യുന്ന ഫയര്‍ ആന്‍ഡ് റസ്‌ക്യൂ സ്‌റ്റേഷന്‍ കോംപൗണ്ടില്‍ ഇപ്പോള്‍ വെയിലും മഴയുമേറ്റു കിടക്കുകയാണ്.
തകരാറുകള്‍ പരിഹരിക്കുന്നതിനായി ഫണ്ട് അനുവദിക്കണമെന്നാവശ്യപ്പെട്ട് കൃഷി ഓഫിസര്‍ അപേക്ഷ നല്‍കിയിരുന്നു. എന്നാല്‍ പാടശേഖര സമിതികള്‍ക്ക് കൈമാറിയ ഉപകരണങ്ങള്‍ സംരക്ഷിക്കേണ്ടത് അവര്‍ തന്നെയാണെന്നാണ് സര്‍ക്കാരിന്റെ നിലപാട്. ഇതോടെ കേടുവന്ന യന്ത്രങ്ങള്‍ വെറുതെ കിടന്നു തുരുമ്പെടുത്ത് നശിക്കുകയാണ്.
എന്നാല്‍ മെയ്ന്റനന്‍സിന് തുക ലഭ്യമാകില്ലെന്നിരിക്കെ നഗരസഭയില്‍ രൂപീകരിച്ച വിള പരിപാലന സേന ഇവ ഏറ്റെടുത്ത് തകരാറുകള്‍ പരിഹരിച്ച് പ്രവര്‍ത്തനക്ഷമമാക്കുന്നതിനുള്ള നടപടികള്‍ എടുത്തു വരികയാണെന്ന് കൃഷി ഓഫിസര്‍ പി. ഷക്കീല പറഞ്ഞു.
വിള പരിപാല സേന വഴി ജോലി ചെയ്യുന്നവര്‍ക്ക് നഗരസഭ നല്‍കുന്ന സബ്‌സിഡി തുക ഉപയോഗിച്ചും യന്ത്രങ്ങളുടെ പരിപാലനം നടത്താനാകുമെന്നാണ് അധികൃതരുടെ കണക്കു കൂട്ടല്‍. കര്‍ഷകര്‍ക്ക് വളരെയേറെ പ്രയോജനം ലഭിക്കുന്ന യന്ത്രങ്ങള്‍ തുരുമ്പെടുത്ത് നശിക്കുന്നതില്‍ കര്‍ഷകരുടെ പ്രതിഷേധവും ശക്തമായിരിക്കുകയാണ്.