മലപ്പുറം: അപ്രായോഗിക ഉത്തരവുകള്‍ അടിച്ചേല്‍പ്പിക്കാന്‍ ശ്രമിക്കുന്ന സര്‍ക്കാര്‍ നീക്കത്തിനെതിരേ ഹൈക്കോടതിയെയും ആവശ്യമെങ്കില്‍ സുപ്രീം കോടതിയെയും സമീപിക്കുമെന്ന് എയ്ഡഡ് സ്‌കൂള്‍ മാനേജര്‍മാരുടെ പ്രതിഷേധസംഗമം മുന്നറിയിപ്പ് നല്‍കി.
പൊതുവിദ്യാഭ്യാസ മേഖലയില്‍ എണ്ണായിരത്തോളം വരുന്ന എയ്ഡഡ് സ്‌കൂള്‍ മാനേജര്‍മാരെ വിശ്വാസത്തിലെടുക്കാതെ സര്‍ക്കാറിന്റെ അപ്രായോഗിക ഉത്തരവുകള്‍ അടിച്ചേല്‍പ്പിക്കുന്നതിലൂടെ പൊതുവിദ്യാഭ്യാസ മേഖല പ്രതിസന്ധി നേരിടുകയാണ്. കെ.ഇ.ആര്‍ ഭേദഗതിയും സര്‍ക്കാറിന്റെ അപ്രായോഗിക ഉത്തരവുകളും ഹൈക്കോടതിയും സുപ്രീം കോടതിയും സ്‌റ്റേ ചെയ്തിട്ടു പോലും 2016 ജ നുവരി 29ന് ശേഷം നിയമപരമായി നിയമനം ലഭിച്ച അധ്യാപകരുടെ അംഗീകാരവും ശമ്പളവും നല്‍കാതെ സര്‍ക്കാര്‍ അനന്തമായി നീട്ടിക്കൊണ്ടുപോകുകയാണ്. ഈ നടപടികള്‍ക്കെതിരേ മാനേജര്‍മാരും അധ്യാപകരും ഒറ്റക്കെട്ടായി പ്രത്യക്ഷ സമരത്തിനിറങ്ങും. സംസ്ഥാന സെക്രട്ടറി നാസര്‍ എടരിക്കോട് ഉദ്ഘാടനം ചെയ്തു. ജില്ലാ പ്രസിഡന്റ് കെ.വി.കെ ഹാഷിം കോയ തങ്ങള്‍, ജില്ലാ ജനറല്‍ സെക്രട്ടറി സൈനുല്‍ ആബിദ് പട്ടര്‍കുളം, നാരായണന്‍ നമ്പൂതിരിപ്പാട് മാറാക്കര, നാരായണന്‍ ചേലേമ്പ്ര, മോഹന കൃഷ്ണന്‍ തേഞ്ഞിപ്പലം, മൂസ മറ്റത്തൂര്‍, ലത്തീഫ് കല്ലിങ്ങല്‍പറമ്പ്, കലാം മാസ്റ്റര്‍ ഛാത്രത്തൊടിക, സുരേഷ് പൊന്നാനി, ഷൈസന്‍ എടപ്പാള്‍, ഷംസു പെരിന്തല്‍മണ്ണ, സക്കീര്‍ കരുളായി, കറപ്പന്‍ തിരൂര്‍, സുബൈര്‍ അരീക്കോട്, യു.സി നാരായണന്‍ വണ്ടൂര്‍, ലുക്മാന്‍ മങ്കട സംസാരിച്ചു.