ന്യൂഡല്‍ഹി: ജമ്മുകശ്മിരിലെ ഷോപ്പിയാനില്‍ ജനുവരി 27ന് സൈന്യം മൂന്നുപേരെ വെടിവച്ചുകൊലപ്പെടുത്തിയ കേസില്‍ മേജര്‍ ആദിത്യകുമാറിനെതിരായ അന്വേഷണം സുപ്രിം കോടതി തടഞ്ഞു. മകന്റെ പേര് എഫ്.ഐ.ആറില്‍ ഉള്‍പ്പെടുത്തിയ സംസ്ഥാന പൊലിസിന്റെ നടപടി ചോദ്യംചെയ്ത് പിതാവ് ലഫ്.കേണല്‍ കരംവീര്‍ സിങ് നല്‍കിയ ഹരജി പരിഗണിച്ച് ചീഫ് ജസ്റ്റിസ് ദീപക് മിശ്ര അധ്യക്ഷനായ ബെഞ്ചിന്റെതാണ് നടപടി. കേസ് അടുത്തമാസം 24നു വീണ്ടും പരിഗണിക്കും. വെടിവയ്പുമായി ബന്ധപ്പെട്ട് നിയമവിരുദ്ധമായാണ് പേര് എഫ്.ഐ.ആറില്‍ ചേര്‍ത്തതെന്നും എഫ്.ഐ.ആര്‍ റദ്ദാക്കണമെന്നുമാണ് ആവശ്യം.
എഫ്.ഐ.ആറില്‍ മേജറുടെ പേരുണ്ടെങ്കിലും പ്രതിയെന്ന നിലയ്ക്കല്ല പേര് പരാമര്‍ശിച്ചതെന്ന് ജമ്മു സര്‍ക്കാര്‍ കോടതിയെ അറിയിച്ചു. ആദിത്യകുമാര്‍ കേസില്‍ പ്രതിയാകുമോ എന്ന ചോദ്യത്തിന്, അത് അന്വേഷണത്തിനനുസരിച്ചിരിക്കുമെന്ന സര്‍ക്കാര്‍ മറുപടിയില്‍ തൃപ്തിയാവാതിരുന്ന ചീഫ്ജസ്റ്റിസ്, മേജറിനെ സാധാരണ ക്രിമിനലുകളെ പോലെ പരിഗണിക്കരുതെന്ന് ആവശ്യപ്പെട്ടു.