പേരാമ്പ്ര: നിരവധി കായിക താരങ്ങളെ രാജ്യത്തിനു സംഭാവന ചെയ്ത ചക്കിട്ടപാറക്കു കായിക ഭൂപടത്തിലുള്ള സ്ഥാനം സംബന്ധിച്ചു ഏകദിന സെമിനാര്‍ സംഘടിപ്പിക്കുന്നു. ചക്കിട്ടപാറ സര്‍വിസ് സഹകരണ ബാങ്കിന്റെ അറുപതാം വാര്‍ഷികാഘോഷങ്ങളുടെ ഭാഗമായാണ് കായിക മേഖലയിലെ പ്രമുഖരെ പങ്കെടുപ്പിച്ചു കൊണ്ട് പരിപാടി നടത്തുന്നത്. ഈ മാസം 11ന് രാവിലെ പത്തരയ്ക്കു ബാങ്ക് ഓഡിറ്റോറിയത്തിലാണു സെമിനാര്‍. നവീന സൗകര്യങ്ങളൊരുക്കി ചക്കിട്ടപാറയെ കായിക ഭൂപടത്തിന്റെ മുഖ്യധാരയില്‍ എത്തിക്കുന്ന പദ്ധതികള്‍ക്കു സര്‍ക്കാര്‍ സഹായത്തോടെ രൂപം നല്‍കി നടപ്പാക്കാനാണ് ലക്ഷ്യമിടുന്നതെന്ന് സംഘാടക സമിതി രൂപീകരണ യോഗത്തില്‍ അധ്യക്ഷനായ ബാങ്ക് പ്രസിഡന്റ് ഇ.എസ് ജെയിംസ് പറഞ്ഞു. ചക്കിട്ടപാറ ഗ്രാമീണ സ്‌പോര്‍ട്‌സ് അക്കാദമി കോച്ച് കെ.എം പീറ്റര്‍ യോഗത്തില്‍ മുഖ്യ പ്രഭാഷണം നടത്തി.
കെ.എസ് ആന്റണി, ഷാജു സെബാസ്റ്റ്യന്‍, രാജന്‍ വര്‍ക്കി, ബെന്നി കാരിത്തടത്തില്‍, ഷാജു മാളിയേക്കല്‍, പി.എം വേണുഗോപാല്‍, കെ.പി കെ ചോയി, വി.പി മുഹസിന്‍, കെ.എം ജോസ്, ബേബി കാപ്പുകാട്ടില്‍, സന്ദേശന്‍ പള്ളൂരുത്തി, ഹനീഫ ചെമ്പ്ര, ബാങ്ക് സെക്രട്ടറി വി. ഗംഗാധരന്‍, കെ.എം ജോസ് സംസാരിച്ചു.