കുവൈത്ത് സിറ്റി: കുവൈത്തില്‍ ജോലിക്ക് പോകാന്‍ ആഗ്രഹിക്കുന്നവരാണോ? വ്യജ റിക്രൂട്ടിങ് ഏജന്‍സികളുടെയും കമ്പനികളുടെയും ചതിയില്‍ വീഴാതിരിക്കാന്‍ ജാഗ്രത പാലിക്കണമെന്ന് കുവൈത്തിലെ ഇന്ത്യന്‍ എംബസി എംബസി മുന്നറിയിപ്പ് നല്‍കി. കഴിഞ്ഞ ദിവസം എംബസി ലേബര്‍ വിഭാഗം വെബ്‌സൈറ്റില്‍ അപ്ലോഡ് ചെയ്ത പുതിയ പട്ടികയില്‍ ഇത്തരം തട്ടിപ്പുകാരായ 18 ഇന്ത്യന്‍ ഏജന്‍സികളുടെയും 160 കുവൈത്ത് കമ്പനികളുടെയും പേരുകള്‍ ഉള്‍പ്പെടുത്തിയിട്ടുണ്ട്. ഇതില്‍ ഡല്‍ഹിയിലെ 8 ഏജന്‍സികളും മുംബൈയിലെ 4 ഏജന്‍സികളും ഉണ്ട്.

കുവൈത്തിലെ ജനറല്‍ ട്രേഡിങ്, കോണ്‍ട്രാക്ടിങ്, കേറ്ററിങ്, റെസ്റ്റോറന്റുകള്‍, മെഡിക്കല്‍, ട്രാന്‍സ്‌പോര്‍ട്ടേഷന്‍ എന്നീ മേഖലകളില്‍ പ്രവര്‍ത്തിക്കുന്ന കമ്പനികളെയാണ് ബ്ലാക്ക്‌ലിസ്റ്റില്‍ ഉള്‍പ്പെടുത്തിയിരിക്കുന്നത്. അല്‍ മനാര്‍ സ്റ്റാര്‍ കമ്പനി ഫോര്‍ ഡെലിവറിങ് കണ്‍സ്യൂമര്‍ ഓര്‍ഡേഴ്‌സ്, ഹുദാസ് സെന്റര്‍ ഫോര്‍ ഏര്‍ലി ലേണിങ് കമ്പനി ഫോര്‍ മാനേജിങ് നഴസ് എന്നി പ്രമുഖ കമ്പനികളും ഈ പട്ടികയിലുണ്ട്.

പാസ്‌പോര്‍ട്ട് പിടിച്ചുവയ്ക്കല്‍, ശമ്പളം നല്‍കാതിരിക്കുക, ശാരീരിക പീഡനം എന്നിങ്ങനെയുള്ള പരാതികള്‍ ലഭിച്ചതിന്റെ അടിസ്ഥാനത്തിലാണ് ഈ കമ്പനികളെ ബ്ലാക്ക്‌ലിസ്റ്റില്‍ ഉള്‍പ്പെടുത്തിയത്. എംബസിയില്‍ ലഭിക്കുന്ന പരാതികള്‍ ആദ്യം ബന്ധപ്പെട്ട കമ്പനികളുമായി ചര്‍ച്ച നടത്തി പരിഹാരം കാണാന്‍ ശ്രമിക്കും, എന്നാല്‍, പരാതികള്‍ പരിഹരിക്കപ്പെടാതെ വന്നാല്‍ കുവൈത്ത് വിദേശകാര്യ മന്ത്രാലയവുമായി ബന്ധപ്പെടുകയും തൊഴിലാളികളോട് കോടതിയില്‍ കേസ് കൊടുക്കാന്‍ നിര്‍ദ്ദേശിക്കുകയും ചെയ്യും.

ഈ ബ്ലാക്ക്‌ലിസ്റ്റില്‍ ഉള്‍പ്പെട്ട കമ്പനികളിലേക്ക് പുതിയ ഇന്ത്യന്‍ തൊഴിലാളികളെ റിക്രൂട്ട് ചെയ്യുന്നതിന് എംബസി അനുവദിക്കില്ല. ഈ കമ്പനികളെ തൊഴിലാളി റിക്രൂട്ട്‌മെന്റിന് ഓണ്‍ലൈന്‍ മുഖേന അപേക്ഷിക്കാനുള്ള സംവിധാനത്തില്‍ നിന്നും താല്‍ക്കാലികമായി നിരോധിക്കും. വിപുലമായ അന്വേഷണം നടത്തിയാണ് ഒരു കമ്പനിയെ ബ്ലാക്ക്‌ലിസ്റ്റില്‍ ഉള്‍പ്പെടുത്തുക. പിന്നീട് ഈ ബ്ലാക്ക്‌ലിസ്റ്റില്‍ നിന്നും പുറത്തുവരാന്‍ ആഗ്രഹിക്കുന്ന കമ്പനികള്‍ കുവൈത്തിലെ ഇന്ത്യന്‍ എംബസിയുടെ അനുകൂല റിപ്പോര്‍ട്ട് സമര്‍പ്പിക്കണം. അതേസമയം റിപ്പോര്‍ട്ട് ലഭിക്കുന്നതിനായി അവര്‍ മുന്‍പ് ചെയ്ത തെറ്റുകള്‍ പൂര്‍ണ്ണമായും പരിഹരിച്ചിരിക്കണം.

കൂടൂതൽ ​ഗൾഫ് വാർത്തകളറിയാൻ ഈ ഗ്രൂപ്പിൽ ജോയിൻ ചെയ്യുക

The Indian Embassy in Kuwait has published a blacklist of 18 Indian recruitment agencies and 160 Kuwait-based companies implicated in recruitment malpractices, ensuring protection for Indian workers.