ന്യൂ ഡല്‍ഹി: ഇന്ത്യന്‍ വനിതാ ഹോക്കി ടീമിന് തുടര്‍ച്ചയായ രണ്ടാം ജയം. കൊറിയയില്‍ ഇന്ത്യന്‍ ടീം നടത്തുന്ന പര്യാടനത്തിലാണ് തുടര്‍ച്ചയായ രണ്ടാം മത്സരത്തിലും വനിതാ ടീം വിജയിച്ചത്. ആദ്യ മത്സരത്തില്‍ ഒരു ഗോളിനായിരുന്നു ഇന്ത്യയുടെ ജയം. രണ്ടാം മത്സരത്തില്‍ 3-2 എന്ന സ്‌കോറിന് കൊറിയയെ തോല്‍പിച്ചത്. അഞ്ചാം മിനുട്ടില്‍ പൂനം റാണിയാണ് ഇന്ത്യക്കായി ആദ്യ ഗോള്‍ നേടിയത്. ആദ്യ ക്വാര്‍ട്ടറില്‍ തന്നെ കൊറിയ ഗോള്‍ തിരിച്ചടിച്ച് സമനില പാലിച്ചു. 27-ാം മിനുട്ടില്‍ ഇന്ത്യന്‍ താരം റാണി ഇന്ത്യക്കായി രണ്ടാമതും സ്‌കോര്‍ ചെയ്തു. ഇതിന് പിറകെ തന്നെ കൊറിയ സമനില ഗോള്‍ നേടി കളിയിലേക്ക് തിരിച്ചു വന്നെങ്കിലും പിന്നീട് ലഭിച്ച പെനാല്‍റ്റി ഗുര്‍ജീത് കൗര്‍ ഗോളാക്കി മാറ്റിയതോടെ ഇന്ത്യ ഒരു ഗോളിന്റെ ലീഡുമായി വിജയിച്ച് കളംവിട്ടു. അഞ്ച് മത്സരങ്ങളുള്ള പരമ്പരയില്‍ ഇന്ത്യ 2-0 മുന്നിലാണിപ്പോള്‍.