ന്യൂഡല്‍ഹി: ശുഹൈബ് വധം സി.ബി.ഐക്കു വിട്ടുള്ള ഹൈക്കോടതി വിധി മുഖ്യമന്ത്രിക്കുള്ള മുന്നറിയിപ്പാണെന്നും ചരിത്രപരമായ വിധിയെ സന്തോഷത്തോടെ സ്വാഗതം ചെയ്യുന്നുവെന്നും കോണ്‍ഗ്രസ് പ്രവര്‍ത്തകസമിതിയംഗം എ.കെ ആന്റണി.
മുഖ്യമന്ത്രിയും മന്ത്രിമാരും സി.പി.എം നേതാക്കളും തലയില്‍ മുണ്ടിട്ട് നടക്കേണ്ട അവസ്ഥയിലായിരിക്കുകയാണ്. വിധി സര്‍ക്കാരിനേറ്റ കനത്ത തിരിച്ചടിയാണ്. കണ്ണൂരിനേയും കേരളത്തിലെ മറ്റ് സംഘര്‍ഷമേഖലകളേയും രാഷ്ട്രീയ കൊലപാതകങ്ങളില്‍നിന്ന് മോചിപ്പിക്കാന്‍ വിധി സഹായകരമാകും. സാംസ്‌കാരികമായി മുന്നിട്ട് നിന്നിരുന്ന കണ്ണൂരില്‍ കൊലപാതക രാഷ്ട്രീയത്തിന് തുടക്കം കുറിച്ചത് കമ്മ്യൂണിസ്റ്റ് പാര്‍ട്ടിയാണ്. കൊലപാതകത്തിന് ശേഷം വാടകഗുണ്ടകളെ ഹാജരാക്കി കേസുകള്‍ തേച്ചുമാച്ച് കളയുന്ന രീതിയാണ് കണ്ണൂരിലേത്. കൊന്നവരെ മാത്രമല്ല കൊല്ലിച്ചവരേയും നിയമത്തിന് മുന്നില്‍ ഹാജരാക്കണം. എന്നാല്‍, ഇതിന് മുന്‍പ് നടന്ന രാഷ്ട്രീയ കൊലപാതകങ്ങളിലെ കൊല്ലിച്ചവരെ കണ്ടെത്താനായിട്ടില്ല. ശുഹൈബ് വധക്കേസിലെ ഹൈക്കോടതി വിധിയിലൂടെ ഇതിന് മാറ്റംവരും. ഹൈക്കോടതിയെ സമീപിച്ച് സി.ബി.ഐ അന്വേഷണത്തിന് ഉത്തരവ് നേടിയെടുത്ത ശുഹൈബിന്റെ കുടുംബത്തിന്റെ ധീരതയെ അഭിനന്ദിക്കുന്നുവെന്നും ആന്റണി മാധ്യമങ്ങളോട് പറഞ്ഞു.