തിരുവനന്തപുരം: ദേശീയ പള്‍സ് പോളിയോ ഇമ്മ്യൂണൈസേഷന്‍ ജില്ലാതല ഉദ്ഘാടനം നാളെ രാവിലെ എട്ട് മണിക്ക് പാറശ്ശാല താലൂക്ക് ഹെഡ് ക്വാര്‍ട്ടേഴ്‌സ് ആശുപത്രിയില്‍ നടക്കുമെന്ന് ജില്ലാ ആര്‍.സി.എച്ച് ഓഫിസര്‍ ഡോ. പ്രസന്നകുമാരി വാര്‍ത്താസമ്മേളനത്തില്‍ അറിയിച്ചു.
ബ്ലോക്ക് പഞ്ചായത്ത് പ്രസിഡന്റ് സലൂജ വി.ആര്‍ന്റെ അധ്യക്ഷതയില്‍ സി.കെ ഹരീന്ദ്രന്‍ എം.എല്‍.എ ഉദ്ഘാടനം ചെയ്യും. 2.31 ലക്ഷം പേര്‍ക്ക് 2642 ബൂത്തുകള്‍ വഴി പോളിയോ ലഭ്യമാക്കും.
യാത്രാവേളയിലുള്ള കുട്ടികള്‍ക്ക് തുള്ളിമരുന്ന് നല്‍കുന്നതിനായി 60 ട്രാന്‍സിറ്റ് ബൂത്തുകളും അന്യസംസ്ഥാനക്കാരായ കുട്ടികള്‍ക്കായി 64 മൊബൈല്‍ ബൂത്തുകളും ജില്ലയില്‍ പ്രവര്‍ത്തിക്കും.
രാവിലെ എട്ട് മുതല്‍ വൈകിട്ട് അഞ്ച് വരെ ബൂത്തുകള്‍ പ്രവര്‍ത്തിക്കും. അഞ്ചു വയസിന് താഴെയുള്ള എല്ലാ കുട്ടികളെയും ബൂത്തുകളിലെത്തിച്ച് തുള്ളിമരുന്ന് നല്‍കാന്‍ രക്ഷിതാക്കള്‍ ശ്രദ്ധിക്കണമെന്ന് ജില്ലാ ആര്‍.സി.എച്ച് ഓഫിസര്‍ പറഞ്ഞു.