മണ്ണഞ്ചേരി: എസ്.ഡി.പി.ഐ-സി.പി.എം സംഘര്‍ഷത്തെ തുടര്‍ന്ന് ഡി.വൈ.എഫ്.ഐ മാരാരിക്കുളം ബ്ലോക്ക് പ്രസിഡന്റും സി.പി.എം അമ്പനാകുളങ്ങര ലോക്കല്‍ കമ്മറ്റിയംഗവുമായ മണ്ണഞ്ചേരി 14ാം വാര്‍ഡ് പുളിംപറമ്പില്‍ ജയേഷിന്റെ വീടും വാഹനങ്ങളും അടിച്ചു തകര്‍ത്തു.
നാല് ലക്ഷംരൂപയുടെ നഷ്ടം കണക്കാക്കുന്നു. ഞായറാഴ്ച പുലര്‍ച്ചെ രണ്ടോടെയാണ് സംഭവം. നാല് വാഹനങ്ങളിലായി എത്തിയ പത്തോളം പേരാണ് ആക്രമണത്തിന് പിന്നില്‍. വീടിനുമുന്നില്‍ പാര്‍ക്ക് ചെയ്തിരുന്ന കാര്‍,പെട്ടിവണ്ടി,രണ്ട് ഇരുചക്രവാഹനങ്ങള്‍,വീടിന്റെ ജനാല ചില്ലുകള്‍ എന്നിവയാണ് അടിച്ച് തകര്‍ത്തത്. ബഹളം കേട്ട് വീട്ടുകാരും പരിസര വാസികളും ഉണര്‍ന്നപ്പോള്‍ അക്രമികള്‍ രക്ഷപെട്ടു. മണ്ണഞ്ചേരി പൊലിസും ചേര്‍ത്തല ഡി.വൈ.എസ്.പിയും വിരലടയാള വിദഗ്ധരും സ്ഥലത്തെത്തി പരിശോധന നടത്തി.