തൊടുപുഴ: മദ്യപിച്ചു ബൈക്ക് ഓടിച്ച് അപകടം വരുത്തിയ ശേഷം മറ്റൊരു ബൈക്ക് യാത്രക്കാരനുമായി നഗരമധ്യത്തില്‍ വഴക്കുണ്ടാക്കുകയും ഹോംഗാര്‍ഡിനു നേരെ കൈയേറ്റത്തിനു ശ്രമിക്കുകയും ചെയ്തയാള്‍ റിമാന്‍ഡില്‍.
കോലാനി പഞ്ചവടിപ്പാലം സ്വദേശി കാഞ്ഞിരംകുന്നേല്‍ വിശ്വനാഥനെയാണ് (57) പൊലിസ് പിടികൂടിയത്. കോടതിയില്‍ ഹാജരാക്കിയ ഇയാളെ റിമാന്‍ഡ് ചെയ്തു. ഗാന്ധി സ്‌ക്വയറിനു സമീപം പാലാ റോഡില്‍ വിശ്വനാഥന്‍ ഓടിച്ച ബൈക്ക് മറ്റൊരു ബൈക്കില്‍ ഉരസി.
ഇതേത്തുടര്‍ന്ന് ഇയാള്‍ ബൈക്ക് യാത്രക്കാരനുമായി വഴക്കുണ്ടാക്കി. ഇതുകണ്ടു ഗാന്ധി സ്‌ക്വയറില്‍ ഡ്യൂട്ടിയില്‍ ഉണ്ടായിരുന്ന ഹോം ഗാര്‍ഡ് എത്തി കാര്യങ്ങള്‍ ചോദിക്കുന്നതിനിടെ വയര്‍ലസ് സെറ്റ് പിടിച്ചുവാങ്ങാനും കൈയേറ്റത്തിനും ശ്രമിച്ചു.
ഇതിനിടെ ഇയാള്‍ ഓടിരക്ഷപ്പെടാനും ശ്രമിച്ചു. വിശ്വനാഥനെ പിടികൂടി ആശുപത്രിയില്‍ എത്തിച്ചു പരിശോധനയ്ക്കു ശേഷം കോടതിയില്‍ ഹാജരാക്കുകയായിരുന്നു.