കൊട്ടിയം: ശ്രീനാരായണ പബ്ലിക് സ്‌കൂളിന് സമീപത്തെ ഏലാക്ക് അടുത്തുള്ള ആളൊഴിഞ്ഞ ഏക്കറുകളോളം വരുന്ന പുരയിടത്തിലെ പുല്ലിന് തീപിടിച്ചത് പ്രദേശവാസികള്‍ക്കിടയില്‍ പരിഭ്രാന്തിക്ക് കാരണമായി.
പ്രദേശമാകെ പുക കൊണ്ട് മൂടിയതാണ് പരി ഭ്രാന്തിക്ക് കാരണമാക്കിയത്. മുഖത്തല കണിയാം തോട് ഏലായിലും രാവിലെ പത്തരയോടെ തീപിടുത്തം ഉണ്ടായി. അടുത്തുള്ള സ്‌കൂളില്‍ എസ്.എസ്. എല്‍.സി(സി.ബി.എസ്.ഇ) പരീക്ഷ നടക്കുന്ന സമയത്തായിരുന്നു പ്രദേശം പുക കൊണ്ട് മൂടിയത്.തിങ്കളാഴ്ച ഉച്ചയോടെ വക്കേവിള ശ്രീ നാരായണാ പബ്ലിക് സ്‌കൂളിനടുത്തെ ആളൊഴിഞ്ഞ പുരയിടത്തിലാണ് തീപിടുത്തം ഉണ്ടായത്.
ചവറുകളില്‍ പിടിച്ച തീ കരിയിലകളില്‍ പിടിച്ച ശേഷം മരങ്ങളിലേക്ക് പടരുകയായിരുന്നു. പുക സ്‌കൂളിലേക്ക് പടര്‍ന്നതോടെ പരീക്ഷ എഴുതി കൊണ്ടിരുന്ന കുട്ടികള്‍ക്ക് ബുദ്ധിമുട്ടാകുമെന്നതിനാല്‍ ഫയര്‍ ഫോഴ്‌സിനെ വിവരം അറിയിക്കുകയും സ്‌കൂളിലെ മോട്ടോര്‍ ഉപയോഗിച്ച് വെള്ളം പമ്പ് ചെയ്ത് തീയണക്കുവാന്‍ ശ്രമം നടത്തുകയും ചെയ്തു.
വിവരമറിഞ്ഞ് കൊല്ലത്തു നിന്നും അസി. സ്‌റ്റേഷന്‍ ഓഫിസറുടെ നേതൃത്വത്തിലുള്ള ഫയര്‍ഫോഴ്‌സ് സംഘമെത്തിയാണ് തീയും പുകയും നിയന്ത്രണ വിധേയമാക്കിയത്.
മുഖത്തല കണിയാം തോട് ഏലായിലും രാവിലെ പത്തരയോടെ തീപിടുത്തം ഉണ്ടായി. ഫയര്‍ഫോഴ്‌സ് എത്തിയാണ് തീയണച്ചത്.