ദോഹ: ഖത്തറില്‍ വാണിജ്യ രജിസ്‌ട്രേഷന്‍ അഞ്ചുവര്‍ഷത്തേക്ക് അനുവദിക്കുന്നതിനുള്ള നിര്‍ദേശം സാമ്പത്തിക വാണിജ്യമന്ത്രാലയം സജീവമായി പരിഗണിക്കുന്നു. ഇതു നടപ്പായാല്‍ രജിസ്‌ട്രേഷന്‍ പുതുക്കുന്നതിനുള്ള കാലാവധി അഞ്ചുവര്‍ഷമായി ഉയരും.

നിലവില്‍ വാണിജ്യ രജിസ്‌ട്രേഷന്റെ കാലാവധി ഒരു വര്‍ഷമാണ്. കാലാവധി കഴിയുന്നിന്റെ മുപ്പത് ദിവസത്തിനുള്ളില് കമ്പനികള്‍ രജിസ്‌ട്രേഷന്‍ പുതുക്കണം. ഇതിനു പകരം അഞ്ചുവര്‍ഷത്തേക്ക് രജിസ്‌ട്രേഷന്‍ അനുവദിക്കുന്നതിനാണ് ആലോചിക്കുന്നത്. വാണിജ്യ രജിസ്‌ട്രേഷന്‍ പുതുക്കുന്നതിനുള്ള കാലവാധി നീട്ടുന്നതിനുള്ള ശുപാര്‍ശ മന്ത്രാലയം ഗൗരവമായി പരിഗണിക്കുന്നുണ്ട്.

ശുപാര്‍ശയിന്‍മേലുള്ള പഠനം കണ്‍സള്‍ട്ടേറ്റീവ് കൗണ്‍സിലില്‍ പുരോഗമിക്കുന്നതായി മന്ത്രാലയത്തിലെ രജിസ്‌ട്രേഷന്‍ ആന്റ് ലൈസന്‍സിങ് ഡയറക്ടര്‍ അയിദ് മനാഹി അല്‍ഖഹ്ത്താനി പറഞ്ഞു. വാണിജ്യ രജിസ്‌ട്രേഷന്റെ കാലാവധി ഒരു വര്‍ഷത്തില്‍ നിന്നും അഞ്ചുവര്‍ഷമായി വര്‍ധിപ്പിക്കണമെന്ന് നിരവധി കമ്പനികളുടെ പ്രതിനിധികള്‍ ആവശ്യപ്പെട്ടുവരുന്നതായി ഖത്തര്‍ ചേംബര്‍ ബോര്‍ഡംഗം അലി അബ്ദുല്‍ ലത്തീഫ് അല്‍മിസ്‌നദ് പറഞ്ഞു.