കൊച്ചി: നടിയെ ആക്രമിച്ച കേസിലെ നിര്‍ണായ തെളിവായ ദൃശ്യങ്ങളുടെ പകര്‍പ്പ് നല്‍കണമെന്നാവശ്യപ്പെട്ട് നടന്‍ ദിലീപ് നല്‍കിയ ഹരജി ഹൈക്കോടതി തിങ്കളാഴ്ച പരിഗണിക്കാനായി മാറ്റി.
കേസിലെ പ്രതിയായ തനിക്ക് ദൃശ്യങ്ങളുടെ പകര്‍പ്പിന് അവകാശമുണ്ടെന്നാണ് ദിലീപിന്റെ വാദം.
നേരത്തെ ദിലീപ് അങ്കമാലി ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേട്ടറ്റ് കോടതിയില്‍ ഈ ആവശ്യം ഉന്നയിച്ചിരുന്നെങ്കിലും അനുവദിച്ചിരുന്നില്ല.
ദൃശ്യങ്ങളുടെ പകര്‍പ്പ് ദിലീപിന് നല്‍കുന്നത് ഇരയായ നടിയെ പ്രതികൂലമായി ബാധിക്കുമെന്ന് ചൂണ്ടിക്കാട്ടി പ്രോസിക്യൂഷന്‍ എതിര്‍ത്തതിനെത്തുടര്‍ന്നാണ് കോടതി ഇതു നിഷേധിച്ചത്.
തുടര്‍ന്നാണ് ദിലീപ് ഹൈക്കോടതിയെ സമീപിച്ചത്. നടിയുടെ ദൃശ്യങ്ങള്‍ തനിക്കെതിരായ തെളിവാക്കി മാറ്റാന്‍ കൃത്രിമം നടത്തിയിട്ടുണ്ടെന്നും ഇതു പരിശോധിക്കാന്‍ പകര്‍പ്പ് വേണമെന്നുമാണ് ദിലീപിന്റെ ഹരജിയില്‍ പറയുന്നത്.