ആലപ്പുഴ: നഗരസഭയുടെ ശതാബ്ദി സ്മാരക മന്ദിരത്തിന്റെ നിര്‍മാണം ദ്രുതഗതിയില്‍ പുരോഗമിക്കുന്നു. പത്തര കോടി വിനിയോഗിച്ച് കളക്ടട്രേറ്റ് ജങ്ഷന് സമീപത്തായി അഞ്ചു നിലകളിലായാണ് മന്ദിം നിര്‍മ്മിക്കുന്നത്. നഗരസഭയുടെ തനത് ഫണ്ടില്‍നിന്നാണ് തുക ചെലവഴിക്കുന്നത്. നിര്‍മാണം ആരംഭിച്ച് രണ്ടു മാസമായപ്പോള്‍ ഒരു നിലയുടെ പണി പൂര്‍ത്തിയായി.
പൊതുമേഖലാ സ്ഥാപനമായ ഹാബിറ്റാറ്റിനാണ് നിര്‍മാണ ചുമതല. നിലവില്‍ നഗരസഭയുടെ ഓഫീസ് മന്ദിരത്തിലെ അസൗകര്യങ്ങള്‍ കണക്കിലെടുത്താണ് പുതിയ കെട്ടിടം നിര്‍മിക്കുന്നത്. 100 പേര്‍ക്ക് ഇരിക്കാവുന്ന കൗണ്‍സില്‍ ഹാള്‍ ഉള്‍പ്പെടെ പുതിയ മന്ദിരത്തിലുണ്ടാവും. ഒരു വര്‍ഷംകൊണ്ട് നിര്‍മ്മാണം പൂര്‍ത്തിയാക്കാനാവുമെന്ന് കരുതുന്നു.
തൊഴിലാളി യൂണിയനുകളടക്കം നിര്‍മ്മാണത്തിന് പൂര്‍ണം സഹകരണം നല്‍കുന്നുണ്ട്. 2019 ല്‍ നിര്‍മ്മാണം പൂര്‍ത്തിയാക്കി നഗരസഭയുടെ പ്രവര്‍ത്തനം പുതിയ കെട്ടിടത്തിലേയ്ക്ക് മാറ്റാനാണ് ഉദ്ദേശിക്കുന്നത്. നിലവിലുള്ള നഗരസഭാ മന്ദിരം ഗസ്റ്റ് ഹൗസാക്കും.