കോഴിക്കോട്: കീം ഫലം മാറ്റി പ്രഖ്യാപിച്ചതിന് പിന്നാലെ എൻജിനീയറിങ് റാങ്ക് പട്ടികയിൽ വലിയ മാറ്റം. കേരള സിലബസിൽ റാങ്കിങ്ങിൽ 2000 വരെ താഴെ പോയി. ആദ്യ പട്ടികയിൽ 2913 റാങ്കുള്ള വിദ്യാർത്ഥിക്ക് പുതിയ പട്ടിക പ്രകാരം റാങ്ക് 4723 ആയി മാറി. ആദ്യത്തെ പട്ടികയിൽ 2782 റാങ്കുള്ള വിദ്യാർത്ഥി 4489 റാങ്കിലേക്ക് താഴ്ന്നു. കേരള സിലബസ്സുകാർ റാങ്കിങ്ങിൽ താഴെ പോയപ്പോൾ സിബിഎസ്ഇക്കാർക്കാണ് വലിയ നേട്ടം ഉണ്ടായത്. 

കീം പ്രവേശന പരീക്ഷയുടെ പുതുക്കിയ റാങ്ക് ലിസ്റ്റ് കഴിഞ്ഞ ദിവസമാണ് പുറത്തുവിട്ടത്. ആദ്യ നൂറിൽ സംസ്ഥാന സിലബസിൽ പഠിച്ച 21 വിദ്യാർത്ഥികൾ  മാത്രമാണ് ഉൾപ്പെട്ടിട്ടുള്ളത്. നേരത്തെ 43 വിദ്യാർത്ഥികൾ ആയിരുന്നു ഉണ്ടായിരുന്നത്. എന്നാൽ യോഗ്യത നേടിയ വിദ്യാർത്ഥികളുടെ എണ്ണത്തിൽ മാറ്റം സംഭവിച്ചിട്ടില്ല. 

കീമിൽ 76,230 പേരാണ് യോഗ്യത നേടിയിട്ടുള്ളത്. പുതിയ റാങ്ക് ലിസ്റ്റിൽ ഒന്നാം റാങ്ക് നേടിയ വിദ്യാർത്ഥിയുടെ പേരിലും മാറ്റം സംഭവിച്ചിട്ടുണ്ട്. നേരത്തെ അഞ്ചാം റാങ്കുകാരനായ ജോഷ്വാ ജേക്കബ് തോമസ് ആണ് നിലവിൽ ഒന്നാം റാങ്കിലുള്ളത്. പഴയ ലിസ്റ്റിൽ ഒന്നാം സ്ഥാനത്ത് ഉണ്ടായിരുന്ന ജോൺ ഷിനോയ് ഏഴാം റാങ്കിലേക്ക് പിന്തള്ളപ്പെട്ടു. ആദ്യം നൂറുകണങ്കിൽ ഉള്ള വിദ്യാർത്ഥികളിൽ 21 പേർ കേരള സിലബസിൽ പഠിച്ചവരും 79 പേർ സിബിഎസ്ഇ സിലബസിൽ പഠിച്ചവരും ആണ്.