കോഴിക്കോട്: കാലിക്കറ്റ് സർവകലാശാലയിൽ എസ്എഫ്ഐ നടത്തിയ സമരവുമായി ബന്ധപ്പെട്ട് 9 വിദ്യാർഥികളെ അന്വേഷണ വിധേയമായി സസ്പെൻഡ് ചെയ്തു. വൈസ് ചാൻസലറുടെ ഓഫീസിൽ അതിക്രമം നടത്തിയെന്ന് ആരോപിച്ചാണ് നടപടി. സർവകലാശാലകൾ കാവിവത്കരിക്കപ്പെടുന്നുവെന്ന് ആരോപിച്ച് ഈ മാസം 8-ന് എസ്എഫ്ഐ സംഘടിപ്പിച്ച മാർച്ചിനെ തുടർന്നാണ് ഈ സംഭവങ്ങൾ.

സസ്പെൻഷൻ നേരിട്ട വിദ്യാർഥികൾ ഹോസ്റ്റൽ ഒഴിയില്ലെന്ന് വ്യക്തമാക്കി. “ഹോസ്റ്റൽ സർവകലാശാല അനുവദിച്ചതാണ്, ഒഴിയേണ്ട കാര്യമില്ല,” എന്ന് എസ്എഫ്ഐ സംസ്ഥാന ജോയിന്റ് സെക്രട്ടറി മുഹമ്മദ് സാദിഖ് പറഞ്ഞു. വൈസ് ചാൻസലറുടെ നയങ്ങൾ നടപ്പാക്കാനാണ് സസ്പെൻഷൻ നടപടിയെന്നും സമരം തുടരുമെന്നും പറഞ്ഞു.

കെഎസ്‌യുവിന്റെ വിമർശനം

എസ്എഫ്ഐ “9 വർഷമായി ഫ്രീസറിൽ” ഇരിക്കുന്ന സംഘടനയാണെന്ന് കെഎസ്‌യു സംസ്ഥാന അധ്യക്ഷൻ അലോഷ്യസ് സേവ്യർ വിമർശിച്ചു. “വിദ്യാർഥികളെ ബാധിക്കുന്ന ഒരു വിഷയത്തിലും എസ്എഫ്ഐ നിലപാട് സ്വീകരിക്കുന്നില്ല. സർക്കാരിന്റെ അവസാന വർഷത്തിൽ നിലനിൽപ്പിനായി സമരനാടകം കളിക്കുകയാണ്,” പത്തനംതിട്ടയിൽ മാധ്യമപ്രവർത്തകരോട് സംസാരിക്കവെയാണ് എസ്എഫ്ഐയെ വിമർശിച്ചത് “സർക്കാരിന്റെ സെറ്റിൽ അഭിനയിക്കുന്ന നടീനടന്മാരാണ് എസ്എഫ്ഐക്കാർ,”എന്നും കുറ്റപ്പെടുത്തി. നിലമ്പൂരിൽ തോറ്റ സർക്കാരിന്റെ നഗ്നത മറയ്ക്കാൻ ഗവർണർ രാജേന്ദ്ര ആർലേക്കർ “ഉടുതുണി”യുമായി വരുന്നുവെന്നും, കേരള സർവകലാശാലയിലെ വിഷയങ്ങളിൽ ഒന്നാം പ്രതി റജിസ്ട്രാർ അനിൽകുമാറാണെന്നും അദ്ദേഹത്തിന്റെ ഭൂതകാലം സംഘപരിവാറിന്റേതാണെന്നും കെഎസ്‌യു കുറ്റപ്പെടുത്തി.

കീം (KEAM) റാങ്ക് ലിസ്റ്റ് വിഷയത്തിൽ എസ്എഫ്ഐ ഒന്നും മിണ്ടുന്നില്ലെന്ന് അലോഷ്യസ് സേവ്യർ ആരോപിച്ചു. “കീം റാങ്ക് ലിസ്റ്റ് പ്രശ്നം വിദ്യാർഥികളെ മാനസിക സമ്മർദ്ദത്തിലേക്ക് തള്ളിവിട്ടത് സംസ്ഥാന സർക്കാരാണ്. ഇതാണോ നമ്പർ വൺ കേരളം?” അദ്ദേഹം ചോദിച്ചു. ഉന്നത വിദ്യാഭ്യാസ വകുപ്പ് “കെടുകാര്യസ്ഥതയുടെ കൂത്തരങ്ങാണ്” എന്നും മന്ത്രി ഉണ്ടോ എന്ന് സംശയമാണെന്നും പരിഹസിച്ചു. കീം പ്രതിസന്ധിയുമായി ബന്ധപ്പെട്ട് തിങ്കളാഴ്ച ഉന്നത വിദ്യാഭ്യാസ മന്ത്രിയുടെ വസതിയിലേക്ക് കെഎസ്‌യു മാർച്ച് നടത്തുമെന്ന് അറിയിച്ചു.