തിരുവനന്തപുരം: കഞ്ചാവ് വിൽക്കുന്നുവെന്ന വിവരം എക്സൈസ് വകുപ്പിനെ അറിയിച്ചതിന്റെ വൈരാഗ്യത്തിൽ യുവാവിനെ തട്ടിക്കൊണ്ടുപോയി ക്രൂരമായി മർദിച്ച് തല മൊട്ടയടിച്ച് വഴിയിൽ ഉപേക്ഷിച്ചു. സംഭവത്തിൽ മൂന്ന് പ്രതികൾ പൊലീസ് അറസ്റ്റ് ചെയ്തു. മെഡിക്കൽ കോളേജ് സ്വദേശിയായ അബ്ദുള്ള (22) ആണ് ആക്രമണത്തിന് ഇരയായത്. നാലാഞ്ചിറ സ്വദേശി ജിതിൻ എന്ന കാപ്പിരി (33), മരുതൂർ സ്വദേശി ജ്യോതിഷ് (20), മുട്ടട സ്വദേശി സച്ചു ലാൽ (20) എന്നിവരെയാണ് മണ്ണന്തല പൊലീസ് അറസ്റ്റ് ചെയ്തത്.

കഴിഞ്ഞ തിങ്കളാഴ്ച രാത്രി 11 മണിയോടെ വിമാനത്താവളത്തിന് സമീപത്ത് നിന്നാണ് ആറംഗ സംഘം അബ്ദുള്ളയെ ഭീഷണിപ്പെടുത്തി ബലമായി ബൈക്കിൽ കയറ്റി തട്ടിക്കൊണ്ടുപോയത്. നാലാഞ്ചിറയിൽ എത്തിച്ച ശേഷം വടി ഉപയോഗിച്ച് ശരീരമാസകലം ക്രൂരമായി മർദിക്കുകയും വാളുകൊണ്ട് കാൽപാദത്തിൽ വെട്ടി പരുക്കേൽപ്പിക്കുകയും ചെയ്തു. തുടർന്ന് കണ്ണുകെട്ടി ഒഴിഞ്ഞ വീട്ടിൽ കൊണ്ടുപോയി വീണ്ടും മർദനം തുടർന്നു. ട്രിമ്മർ ഉപയോഗിച്ച് അബ്ദുള്ളയുടെ തല മൊട്ടയടിക്കുകയും ചെയ്തു. ഒരു രാത്രിയും പകലും നീണ്ട മർദനത്തിന് ശേഷം ചൊവ്വാഴ്ച വൈകുന്നേരം മുറിഞ്ഞപാലത്ത് ഇറക്കിവിട്ട് പ്രതികൾ രക്ഷപ്പെട്ടു.

ജ്യോതിഷിന്റെ കഞ്ചാവ് കച്ചവടം എക്സൈസിനെ അറിയിച്ചതാണ് ആക്രമണത്തിന് കാരണമെന്ന് പൊലീസ് വ്യക്തമാക്കി. പിടിയിലായ പ്രതികൾ കഞ്ചാവ് വിൽപനയുമായി ബന്ധപ്പെട്ടും അടിപിടി കേസുകളിലും നേരത്തെ പ്രതികളായവരാണ്. ഒന്നാം പ്രതിയായ കാപ്പിരി ജിതിൻ ഒരു വർഷം മുമ്പ് കാപ്പ നിയമപ്രകാരം ജയിൽ ശിക്ഷ അനുഭവിച്ചിട്ടുള്ളയാളാണ്. കേസിൽ ഉൾപ്പെട്ട മറ്റ് രണ്ട് പ്രതികളെ പിടികൂടാനുള്ള അന്വേഷണം പൊലീസ് തുടരുകയാണ്. അറസ്റ്റ് ചെയ്ത പ്രതികളെ നാളെ കോടതിയിൽ ഹാജരാക്കും.

In Thiruvananthapuram, a 22-year-old youth, Abdulla, was kidnapped, brutally beaten, and had his head shaved by a six-member gang for informing the Excise Department about cannabis sales