തിരുവനന്തപുരം: ഭാര്യയെ കൊലപ്പെടുത്താൻ ശ്രമിച്ച കേസിൽ ഭർത്താവിനും കാമുകിക്കും തിരുവനന്തപുരം അഡീഷണൽ ജില്ലാ കോടതി ഏഴ് വർഷം കഠിന തടവും 50,000 രൂപ പിഴയും വിധിച്ചു. പിഴ അടച്ചില്ലെങ്കിൽ ഒരു വർഷം കൂടി തടവ് അനുഭവിക്കണം. പ്രതികൾ യാതൊരു ദയയും അർഹിക്കുന്നില്ലെന്ന പ്രോസിക്യൂഷൻ വാദം കോടതി അംഗീകരിച്ചു.

2015 ജനുവരി 2-ന് ചെമ്മരുതി വില്ലേജിലെ കോവൂർ ദേശത്ത് അരശുവിള നയനവിലാസം വീട്ടിൽ ഗീതാ നളനെ (59) യാണ് പ്രതികളായ അയിരൂർ ചാവർകോട് കാരുണ്യം വീട്ടിൽ നളൻ (59), പുളിമാത്ത് വില്ലേജിലെ പാറവിളവീട്ടിൽ സുജാത (59) എന്നിവർ കൊലപ്പെടുത്താൻ ശ്രമിച്ചത്. ഭർത്താവിന്റെ ദുർനടപ്പിനെ തുടർന്ന് പിണങ്ങി കുടുംബവീട്ടിൽ കഴിഞ്ഞിരുന്ന ഗീത, ഭർത്താവ് കാമുകിയെ വീട്ടിൽ താമസിപ്പിച്ചതറിഞ്ഞ് ചോദ്യം ചെയ്യാൻ എത്തിയപ്പോഴാണ് ആക്രമണം നടന്നത്.

പ്രതികൾ ഗീതയെ ചീത്തവിളിക്കുകയും വീട്ടിൽ നിന്ന് ഇറക്കിവിടാൻ ശ്രമിക്കുകയും ചെയ്തു. എതിർത്തപ്പോൾ, കാമുകി ഗീതയുടെ കഴുത്തിന് കുത്തിപ്പിടിച്ച് വായ തുറപ്പിച്ചു, ഭർത്താവ് പൊട്ടാസ്യം പെർമാഗനേറ്റ് പൊടി വായിലേക്കിട്ടു. മരണവെപ്രാളത്തിൽ ഗീത കുറച്ച് പൊടി തട്ടിക്കളഞ്ഞെങ്കിലും വായിൽ ഗുരുതരമായ പൊള്ളലേറ്റ് ബോധരഹിതയായി. ബന്ധുക്കളും മക്കളും ചേർന്ന് വർക്കല എസ്.എൻ. മെമ്മോറിയൽ ആശുപത്രിയിലും പിന്നീട് തിരുവനന്തപുരം മെഡിക്കൽ കോളേജിലും എത്തിച്ച് അടിയന്തിര ചികിത്സ നൽകിയതിനാൽ ജീവൻ രക്ഷിക്കാനായി.

വർക്കല പൊലീസ് ഇൻസ്പെക്ടർ ബി. വിനോദ് നടത്തിയ അന്വേഷണത്തിനൊടുവിൽ കുറ്റപത്രം സമർപ്പിച്ചു. പ്രോസിക്യൂഷൻ 16 സാക്ഷികളെ വിസ്തരിക്കുകയും 19 രേഖകളും 2 തൊണ്ടിമുതലുകളും ഹാജരാക്കുകയും ചെയ്തു. പബ്ലിക് പ്രോസിക്യൂട്ടർ കാട്ടായിക്കോണം ജെ.കെ. അജിത്ത് പ്രസാദും അഭിഭാഷക ബിന്ദു വി.സി.യും പ്രോസിക്യൂഷന് വേണ്ടി ഹാജരായി. തിരുവനന്തപുരം അഡീഷണൽ ജില്ലാ ജഡ്ജി എം.പി. ഷിബുവാണ് ശിക്ഷ വിധിച്ചത്.

In Thiruvananthapuram, a husband and his girlfriend were sentenced to seven years of rigorous imprisonment and fined ₹50,000 each for attempting to murder the man’s wife, Geetha Nalan, in 2015. The couple tried to kill her by forcing potassium permanganate into her mouth after she questioned the girlfriend’s presence in their home. The victim survived due to timely medical intervention. The court, accepting the prosecution’s argument, found the act brutal and sentenced Nalan (59) and Sujatha (59).