കുണിയ: ദേശീയ പാതയില്‍ മിനി ലോറി കാറിലിടിച്ച് ഏഴു  പേര്‍ക്ക് പരുക്കേറ്റു. അപകടത്തില്‍ ഗുരുതരമായി പരുക്കേറ്റ ഇവരെ  മംഗളൂരുവിലെ ആശുപത്രിയില്‍ പ്രവേശിപ്പിച്ചു.
  ഇന്നലെ രാവിലെ 10.15 ഓടെയാണ്  താഴെ കുണിയ  ബസ് കാത്തിരുപ്പ് കേന്ദ്രത്തിനു സമീപം  അപകടം നടന്നത്.
 പൊയിനാച്ചി ഭാഗത്ത് നിന്നും അമിത വേഗതയില്‍ വന്ന  ചെങ്കല്‍ ലോറി മറ്റൊരു വാഹനത്തെ മറികടന്നു വരുകയും  എതിരെ വരികയായിരുന്ന കാറില്‍ ഇടിക്കുകയുമായിരുന്നു.
  ഇടിയുടെ ആഘാതത്തില്‍  നിയന്ത്രണം  തെറ്റിയ കാര്‍  റോഡില്‍ നിന്നും 20 മീറ്ററോളം അകലേക്ക് തെറിച്ചു വീണു മറിഞ്ഞു.
അപകടത്തില്‍ പാടേ തകര്‍ന്ന കാറില്‍ നിന്നും നാട്ടുകാര്‍ യാത്രക്കാരെ പുറത്തെടുത്ത് ആശുപത്രിയിലെത്തിച്ചു. രാവണേശ്വരത്തെ മഹേഷിന്റെ വിവാഹ ചടങ്ങിനായി ബോവിക്കാനത്തുള്ള  സൗപര്‍ണ്ണിക ഹാളിലേക്ക് ആളുകളെയും കൊണ്ട്  പോവുകയായിരുന്ന   കാറാണ് അപകടത്തിപ്പെട്ടത്.
സംഭവത്തില്‍  കാര്‍ ഡ്രൈവര്‍ കാഞ്ഞങ്ങാട് മഡിയനിലെ ശശി (36),കുണിയ കപ്പണക്കാലിലെ സജീവന്‍ (30),രാജേഷ് കുണ്ടത്തില്‍(34),നിശാന്ത് (34) എന്നിവര്‍ക്കാണ് ഗുരുതരമായി പരുക്കേറ്റത്.
 രാജു (32),സുമേഷ് (30),പ്രതീഷ്  (23) എന്നിവര്‍ക്കും സാരമായി പരുക്കേറ്റു.ഇവരുടെ കൈകാലുകള്‍ക്കാണ് കൂടുതല്‍ പരുക്കേറ്റത്.

   ബേക്കല്‍ പൊലിസ് സ്ഥലത്തെത്തിഅപകടം സംബന്ധിച്ച് അന്വേഷണം തുടങ്ങി.
സംഭവ സ്ഥലത്തിന് സമീപത്തുള്ള  സി. സി ക്യാമറ ടി വിയില്‍ നിന്നും അപകടത്തിന്റെ  ദൃശ്യങ്ങള്‍ പൊലിസ് ശേഖരിച്ചു.