കോഴിക്കോട്: സ്വകാര്യ പരിപാടിയില്‍ പങ്കെടുക്കാനെത്തിയ ചരിത്രകാരന്‍ ഡോ.എം.ജി.എസ് നാരായണനെ ദേഹാസ്വാസ്ഥ്യത്തെ തുടര്‍ന്ന് ആശുപത്രിയില്‍ പ്രവേശിപ്പിച്ചു. ഇന്നലെ വൈകിട്ട് അഞ്ചരയോടെയാണ് സംഭവം. കെ.പി കേശവമേനോന്‍ ഹാളില്‍ സെക്യുലര്‍ ഫോറത്തിന്റെ നേതൃത്വത്തില്‍ കെ.പി രാമനുണ്ണിയെ ആദരിക്കുന്ന ചടങ്ങിനെത്തിയതായിരുന്നു അദ്ദേഹം.
കാറില്‍ നിന്നിറങ്ങുമ്പോള്‍ തന്നെ ശാരീരികാസ്വാസ്ഥ്യം അനുഭവപ്പെട്ടതിനെത്തുടര്‍ന്ന് പരിപാടിയുടെ സംഘാടകര്‍ ആദരിക്കല്‍ ചടങ്ങ് പുറത്തുവച്ച് നടത്തി. അവശനായ എം.ജി.എസിനെ ആദ്യം സമീപത്തുള്ള ചെസ്റ്റ് ആശുപത്രിയിലും പിന്നീട് ബേബി മെമ്മോറിയല്‍ ആശുപത്രിയിലും പ്രവേശിപ്പിക്കുകയായിരുന്നു. ബേബി മെമ്മോറിയല്‍ ആശുപത്രിയില്‍ അത്യാഹിത വിഭാഗത്തില്‍ നിരീക്ഷണത്തിലാണ് ഇദ്ദേഹം.