അടിമാലി: പഞ്ചായത്ത് അംഗത്തെ ജാതിപ്പേര് വിളിച്ച് ആക്ഷേപിച്ചതായി പരാതി. മാങ്കുളം പഞ്ചായത്തിലെ ഒന്നാംവാര്‍ഡ് മെമ്പര്‍ രവീന്ദ്രന്‍ കുഞ്ഞപ്പന്‍ ഇത് സംബന്ധിച്ച് മൂന്നാര്‍ ഡിവൈ.എസ്.പിക്ക് പരാതി നല്‍കി.
ആനകുളത്ത് നില്‍ക്കുബോള്‍ അഴിയാത്ത് റെജിയാണ് പൊതുജന മധ്യത്തില്‍ ജാതിപ്പേര് വിളിച്ച് അപമാനിച്ചത്. മാര്‍ച്ച് 17 ന് നടന്ന സംഭവത്തില്‍ പൊലിസില്‍ പരാതി നല്‍കിയിട്ടും പരിഹാരം ഉണ്ടായില്ലെന്ന് വാര്‍ത്താകുറിപ്പില്‍ വ്യക്തമാക്കി. പുലയ സമുദായ അംഗമാണ്. ജനപ്രതിനിധിയെ ആക്ഷേപിച്ചയാള്‍ക്കെതിരെ ശക്തമായ നിയമനടപടി സ്വീകരിക്കണമെന്നും അല്ലെങ്കില്‍ പൊലിസ് സ്റ്റേഷന്‍ മാര്‍ച്ച് ഉള്‍പ്പെടെയുളള സമരം ആരംഭിക്കുമെന്നും കെ.പി.എം.എസ്. നേതാക്കള്‍ അറിയിച്ചു.