തേഞ്ഞിപ്പലം: വിവിധ പഠന വകുപ്പുകള്‍ മികവിന്റെ കേന്ദ്രങ്ങളാക്കാന്‍ 6 കോടി നീക്കി വച്ച് കാലിക്കറ്റ് സര്‍വകലാശാലയില്‍ ബജറ്റവതരിപ്പിച്ചു.
സര്‍വകലാശാലാ കാംപസില്‍ സുവര്‍ണ ജൂബിലി സ്മാരക സാംസ്‌കാരിക പഠനകേന്ദ്രം സ്ഥാപിക്കും. 2018-19 വര്‍ഷത്തെ സുപ്രധാന പദ്ധതിയാണിതെന്ന് സര്‍വകലാശാലാ സെനറ്റ് യോഗത്തില്‍ ബജറ്റ് അവതരിപ്പിച്ച ധനകാര്യ കമ്മിറ്റി കണ്‍വീനര്‍ പ്രൊഫ.ആര്‍.ബിന്ദു അറിയിച്ചു.
ഇന്റര്‍ ഡിസിപ്ലിനറി മ്യൂസിയങ്ങള്‍, മാനുസ്‌ക്രിപ്റ്റ് ലൈബ്രറി (900 ലക്ഷം), ലൈഫ് സയന്‍സ് വിഭാഗം പുതിയ കെട്ടിടം (200 ലക്ഷം), ബയോടെക്‌നോളജി വകുപ്പിന് പുതിയ കെട്ടിടം (75 ലക്ഷം), യൂണിവേഴ്‌സിറ്റി ടീച്ചര്‍ എഡ്യുക്കേഷന്‍ കേന്ദ്രത്തിന് പുതിയ കെട്ടിടം (100 ലക്ഷം), ലേഡീസ് ഹോസ്റ്റല്‍ പുതിയ ബ്ലോക്ക് (150 ലക്ഷം), ലേഡീസ് ഹോസ്റ്റല്‍ രണ്ടാം നില (225 ലക്ഷം), മെന്‍സ് ഹോസ്റ്റല്‍ (100 ലക്ഷം), ഇന്‍സ്റ്റിറ്റ്യൂട്ട് ഓഫ് ട്രൈബല്‍ സ്റ്റഡീസ് ആന്റ് റിസര്‍ച്ച് അക്കാദമിക് ബ്ലോക്കും മെന്‍സ് ഹോസ്റ്റലും (250 ലക്ഷം), മെച്ചപ്പെട്ട ജലവിതരണം (50 ലക്ഷം), മലിനജല പരിപാലനം (200 ലക്ഷം), ലൈബ്രറിയിലേക്ക് പുസ്തകങ്ങള്‍ വാങ്ങലും ഡിജിറ്റലൈസേഷന്‍ നവീകരണവും (125 ലക്ഷം). ഇതിന് പുറമെ വിജ്ഞാപന വ്യാപന കേന്ദ്രം, സുവര്‍ണ ജൂബിലി അംബേദ്കര്‍ സ്‌കോളര്‍ഷിപ്പ്, ബഷീര്‍ സാംസ്‌കാരിക ഉത്സവം, അംഗപരിമിതര്‍ക്കുള്ള പ്രത്യേക കേന്ദ്രം, വനിതാക്ഷേമ കേന്ദ്രം, അരണാട്ടുകര ജോണ്‍ മത്തായി സെന്റര്‍ വികസനം തിയേറ്റര്‍ കോംപ്ലക്‌സ് എന്നിവ സ്ഥാപിക്കാനും ബജറ്റ് വിഭാവനം ചെയ്യുന്നു.
ക്രിമിനോളജി, ഫോറന്‍സിക് സയന്‍സ് എന്നീ പുതിയ പഠനവകുപ്പുകള്‍ സ്ഥാപിക്കും.യൂണിവേഴ്‌സിറ്റി യൂണിയന്റെ പ്രവര്‍ത്തനങ്ങള്‍ക്കായി 55 ലക്ഷം രൂപയും ഡി.എസ്.യു പ്രവര്‍ത്തനങ്ങള്‍ക്ക് 1,50,000 രൂപയും വകയിരുത്തി. സര്‍വകലാശാലാ ഫെലോഷിപ്പുകള്‍ നല്‍കുന്നതിനായി 220 ലക്ഷം രൂപ നീക്കിവച്ചു. 5 ലക്ഷം രൂപ മെറിപ്പ് സ്‌കോളര്‍ഷിപ്പിനായും മാറ്റിവച്ചു. യൂണിവേഴ്‌സിറ്റിയുടെ സുവര്‍ണ ജൂബിലിയോടനുബന്ധിച്ച് വിവിധ പരിപാടികള്‍ സംഘടിപ്പിക്കാന്‍ 10 ലക്ഷം രൂപ നീക്കിവച്ചിട്ടുണ്ട്. കഴിഞ്ഞ വര്‍ഷത്തെ നീക്കിയിരിപ്പ് ഉള്‍പ്പെടെ 56966.02 ലക്ഷം രൂപ വരവും 45056.46 ലക്ഷം രൂപ ചെലവും 11909.56 ലക്ഷം രൂപ ക്ലോസിങ് ബാലന്‍സും പ്രതീക്ഷിക്കുന്നു. സെനറ്റ് യോഗത്തില്‍ വൈസ് ചാന്‍സലര്‍ ഡോ.കെ.മുഹമമദ് ബഷീര്‍ അധ്യക്ഷനായി.