ചേളാരി: സമസ്ത കേരള സുന്നി ബാലവേദി സംസ്ഥാന കമ്മിറ്റി 'നന്‍മ കൊണ്ട് നാടൊരുക്കാം വിദ്യ കൊണ്ട് കൂടു തീര്‍ക്കാം' എന്ന പ്രമേയത്തില്‍ നടത്തുന്ന സില്‍വര്‍ ജൂബിലിയുടെ ഭാഗമായി സംഘടിപ്പികുന്ന റെയ്ഞ്ചുതല സത്യസമ്മേളനം ഏപ്രില്‍ ഒന്നിന് സംസ്ഥാനത്തിനകത്തും പുറത്തുമായി 429 കേന്ദ്രങ്ങളില്‍ നടക്കും.
വിഡ്ഡി ദിനമായി കണക്കാക്കപ്പെടുന്ന ഏപ്രില്‍ ഒന്നിന് വിദ്യാര്‍ഥികളെ ബോധവല്‍ക്കരിക്കലാണ് സത്യ സമ്മേളനത്തിന്റെ ലക്ഷ്യം. റെയ്ഞ്ച് കേന്ദ്രങ്ങളില്‍ നടക്കുന്ന സമ്മേളനത്തിന്റെ സംസ്ഥാനതല ഉദ്ഘാടനം നാളെ വൈകിട്ട് ഏഴിന് മലപ്പുറം ചെട്ടിപ്പടിയില്‍ നടക്കും.
കോഴിക്കോട് ഖാസിയും സുന്നി യുവജന സംഘം സംസ്ഥാന ജന. സെക്രട്ടറിയുമായ സയ്യിദ് മുഹമ്മദ് കോയ തങ്ങള്‍ ജമലുല്ലൈലി ഉദ്ഘാടനം നിര്‍വഹിക്കും. സമസ്ത കേന്ദ്ര മുശാവറ അംഗം ഡോ. ബഹാഉദ്ദീന്‍ മുഹമ്മദ് നദ്‌വി അധ്യക്ഷനാകും.
എസ്.കെ.എസ്.എസ്.എഫ് സംസ്ഥാന വര്‍ക്കിങ് സെക്രട്ടറി റഷീദ് ഫൈസി വെള്ളായിക്കോട് മുഖ്യപ്രഭാഷണം നിര്‍വഹിക്കും. പി.കെ അബ്ദുറബ്ബ് എം.എല്‍.എ മുഖ്യാതിഥിയാകും. പാണക്കാട് സയ്യിദ് നിയാസലി ശിഹാബ് തങ്ങള്‍, പാണക്കാട് സയ്യിദ് അസീല്‍ അലി ശിഹാബ് തങ്ങള്‍, സയ്യിദ് ഫക്രുദീന്‍ തങ്ങള്‍ കണ്ണന്തളി, എം.എ ചേളാരി, കൊടക് അബ്ദുറഹ്മാന്‍ മുസ്‌ലിയാര്‍, കെ.ടി ഹുസൈന്‍ കുട്ടി മുസ്‌ലിയാര്‍, പുറങ്ങ് മൊയ്തീന്‍ മുസ്‌ലിയാര്‍, അബ്ദുല്‍ ഖാദര്‍ അല്‍ ഖാസിമി, ശാജിഹു ഷമീര്‍ അല്‍ അസ്ഹരി, നൗഷാദ് മുസ്‌ലിയാര്‍ ചെട്ടിപ്പടി, സലാം ദാരിമി ചെമ്മാട്, അലി ഫൈസി മാവണ്ടിയൂര്‍, ലുക്മാനുല്‍ ഹകീം ഫൈസി വഴിപ്പാറ, സയ്യിദ് സ്വദഖത്തുല്ല തങ്ങള്‍ ജമലുല്ലൈലി, അഫ്‌സല്‍ രാമന്തളി, ഫുആദ് വെള്ളിമാട്കുന്ന്, റബീഉദ്ദീന്‍ വെന്നിയൂര്‍ തുടങ്ങിയവര്‍ സംബന്ധിക്കും. 'പറയാം സത്യം മാത്രം അതെത്ര കയ്‌പ്പേറിയതാണെങ്കിലും' എന്ന പ്രമേയം റെയ്ഞ്ച് കേന്ദ്രങ്ങളില്‍ നടക്കുന്ന സത്യ സമ്മേളനത്തില്‍ ചര്‍ച്ച ചെയ്യും.