കരുനാഗപ്പള്ളി: കെ.എസ്.ആര്‍.ടി.സി ഡ്രൈവറേയും കണ്ടക്ടറേയും ബൈക്ക് യാത്രക്കാരന്‍ മര്‍ദിച്ചതായി പരാതി. ബസ് ഡ്രൈവര്‍ കൊല്ലം സ്വദേശി രതീഷ് (36), കണ്ടക്ടര്‍ വിഴിഞ്ഞം സ്വദേശി ജിത്തു (28) എന്നിവര്‍ക്കാണ് മര്‍ദനത്തില്‍ പരുക്കേറ്റത്.
ഇന്നലെ വൈകിട്ട് 6.30 ഓടെകരുനാഗപ്പള്ളി പൊലിസ് സ്റ്റേഷന് മുന്‍പിലായിരുന്നു സംഭവം. താലൂക്കാശുപത്രിയ്ക്ക് മുന്നില്‍ വച്ച് കെ.എസ്.ആര്‍.ടി.സി ബസിന് പിറകിലായി ബൈക്ക് യാത്രക്കാരന്‍ ഹോണ്‍ മുഴക്കുകയും അസഭ്യം പറഞ്ഞ് കൊണ്ട് ഓവര്‍ ടേക്ക് ചെയ്യുവാനും ശ്രമിച്ചു. ബൈക്ക് ചെയ്‌സ് ചെയ്ത് ബസിന് സമീപത്തെത്തുകയും യാത്രക്കാരെ ഇറക്കി കൊണ്ടിരിക്കുന്ന സമയം ഡ്രൈവറുടെ അടുത്ത ഡോര്‍ തുറന്ന് ബൈക്ക് യാത്രക്കാരന്‍ യാതൊരു പ്രകോപനവും ഇല്ലാതെ ഡ്രൈവറെ ചവിട്ടുകയും അടിക്കുകയും ചെയ്തു. ഇത് തടയാന്‍ ശ്രമിച്ച കണ്ടക്ടര്‍ക്കും മര്‍ദനമേറ്റു. വിവരം കരുനാഗപ്പള്ളി ഡിപ്പോയില്‍ അറിയിച്ചതിനെ തുടര്‍ന്ന് ഉദ്യോഗസ്ഥര്‍ സ്ഥലത്തെത്തി പരുക്കേറ്റ ഇരുവരേയും താലൂക്കാശുപത്രിയില്‍ എത്തിച്ചു. കരുനാഗപ്പള്ളി പൊലിസ് സമീപത്തുള്ള വ്യാപാര സ്ഥാപനങ്ങളിലെ സി.സി.ടി.വി ദൃശ്യം പരിശോധിച്ച് പ്രതിയെ കണ്ടെത്താനുള്ള ശ്രമത്തിലാണ്.