പാരിസ്: ഫ്രഞ്ച് ലീഗ് കപ്പ് കിരീടം നിലനിര്‍ത്തി പാരിസ് സെന്റ് ജെര്‍മെയ്ന്‍. തുടര്‍ച്ചയായ അഞ്ചാം തവണയാണ് പി.എസ്.ജി ലീഗ് കപ്പ് നേടുന്നത്. ഫൈനലില്‍ ചിരവൈരികളായ മൊണാക്കോയെ മറുപടിയില്ലാത്ത മൂന്ന് ഗോളുകള്‍ക്ക് വീഴ്ത്തിയാണ് പി.എസ്.ജിയുടെ എട്ടാമത്തെ ലീഗ് കിരീടത്തിലേക്കുള്ള പ്രയാണം.
നെയ്മറിന്റെ അഭാവത്തിലും ആക്രമണത്തിന് ഒട്ടും കുറവ് വരുത്താതെ മത്സരത്തില്‍ വ്യക്തമായ ആധിപത്യം പുലര്‍ത്തിയാണ് ഫ്രഞ്ച് കരുത്തന്മാരുടെ കിരീട നേട്ടം. എഡിന്‍സന്‍ കവാനി ഇരട്ട ഗോളുകള്‍ നേടിയപ്പോള്‍ എയ്ഞ്ചല്‍ ഡി മരിയ ശേഷിച്ച ഗോള്‍ വലയിലാക്കി. കളി തുടങ്ങി എട്ടാം മിനുട്ടില്‍ ലഭിച്ച പെനാല്‍റ്റി വലയിലാക്കി കവാനിയാണ് പി.എസ്.ജിക്ക് ലീഡൊരുക്കിയത്. 21ാം മിനുട്ടില്‍ ഡി മരിയയിലൂടെ ലീഡുയര്‍ത്തി. 85ാം മിനുട്ടില്‍ തന്റെ രണ്ടാം ഗോളിലൂടെ കവാനി ടീമിന്റെ പട്ടിക പൂര്‍ണമാക്കി.