റിയാദ്: സഊദി പ്രതിരോധ മന്ത്രാലയത്തിന്റെ കീഴില്‍ സഊദി അനുകൂല രാജ്യങ്ങളുടെ സംയുക്ത സൈനികാഭ്യാസത്തിന്റെ രണ്ടാംഘട്ടത്തിന് തുടക്കമായി. ജോയിന്റ് ഗള്‍ഫ് ഷീല്‍ഡ് 1 എന്ന് പേരിട്ടിരിക്കുന്ന സൈനികാഭ്യാസം മേഖലയിലെ ഏറ്റവും വലിയ അഭ്യാസമാണ്.
സഊദി സഖ്യ രാജ്യങ്ങളായ 23 അംഗ രാജ്യങ്ങളുടെ സംയുക്താഭിമുഖ്യത്തിലാണ് സൈനികാഭ്യാസം.
അഞ്ചു ദിവസങ്ങളിലായി നടക്കുന്ന സൈനികാഭ്യാസം ഗള്‍ഫ് മേഖലയുടെ സംരക്ഷണമാണ് ലക്ഷ്യമിടുന്നത്. കൂടാതെ മേഖലയുടെ സഹകരണം കൂടുതല്‍ ശക്തമാക്കുകയെന്ന ലക്ഷ്യവും ഇതിനുണ്ട്. സൈനികാഭ്യാസത്തിന്റെ ഒന്നാംഘട്ടം കഴിഞ്ഞ വ്യാഴാഴ്ച സമാപിച്ചിരുന്നു.
23 അംഗ രാജ്യങ്ങളിലെ കര, നാവിക, വ്യോമ, വ്യോമ പ്രതിരോധ, സ്‌പെഷല്‍ ഫോഴ്‌സ് എന്നീ സൈനിക വിഭാഗങ്ങളാണ് പങ്കെടുക്കുന്നതെന്ന് ജോയന്റ് ഗള്‍ഫ് ഷീല്‍ഡ് 1 ഔദ്യോഗിക വക്താവ് ബ്രിഗേഡിയര്‍ ജനറല്‍ അബ്ദുല്ല ബിന്‍ ഹുസൈന്‍ അല്‍ സുബൈഹി വ്യക്തമാക്കി.
സഊദി നാഷനല്‍ ഗാര്‍ഡ്, ആഭ്യന്തര മന്ത്രാലയങ്ങളുടെ കീഴിലുള്ള സൈനികര്‍ പങ്കെടുക്കുന്ന പരേഡില്‍ പാകിസ്താന്‍, ഈജിപ്ത്, ബഹ്‌റൈന്‍, കുവൈത്ത്, ജോര്‍ദാന്‍, സുഡാന്‍, യു.എ.ഇ എന്നീ രാജ്യങ്ങളിലെ യുദ്ധ കപ്പലുകളും പങ്കെടുക്കാനായി എത്തിചേര്‍ന്നിട്ടുണ്ട്.