കെയ്‌റോ: ഈജിപ്തില്‍ പ്രസിഡന്റ് അബ്ദുല്‍ ഫത്താഹ് സീസിയുടെ വിജയം 97 ശതമാനം വോട്ടുകള്‍ക്ക്. നാലു വര്‍ഷം മുന്‍പ് നടന്ന തെരഞ്ഞെടുപ്പിലും ഇത്രയും ശതമാനം വോട്ട് അദ്ദേഹം സ്വന്തമാക്കിയിരുന്നു. ഫലം നേരത്തെ പുറത്തുവന്നിരുന്നെങ്കിലും ഇന്നലെയാണ് ഈജിപ്ഷ്യന്‍ തെരഞ്ഞെടുപ്പ് കമ്മിഷന്‍ ഔദ്യോഗികമായി ഫലപ്രഖ്യാപനം നടത്തിയത്. 41 ശതമാനം പോളിങ്ങാണ് രാജ്യത്ത് ആകെ രേഖപ്പെടുത്തിയത്. മൊത്തം 21.8 മില്യന്‍ വോട്ടാണ് സീസി സ്വന്തമാക്കിയത്. എതിര്‍ സ്ഥാനാര്‍ഥി മൂസ മുസ്തഫ മൂസ 6,56,534 വോട്ടും നേടി. 1.8 മില്യന്‍ വോട്ട് അസാധുവാകുകയും ചെയ്തതായി തെരഞ്ഞെടുപ്പ് കമ്മിഷന്‍ അറിയിച്ചു. ബാലറ്റ് പേപ്പറിലില്ലാത്ത സ്ഥാനാര്‍ഥിക്കു വോട്ട് രേഖപ്പെടുത്തിയതിനാണ് ഇത്രയും പേരുടെ വോട്ട് അസാധുവായത്.
നാമനിര്‍ദേശ പത്രിക സമര്‍പ്പിക്കാനുള്ള സമയം അവസാനിക്കുന്നതിനു തൊട്ടുമുന്‍പാണ് മൂസ തെരഞ്ഞെടുപ്പ് ചിത്രത്തിലെത്തിയത്.