തിരുവനന്തപുരം: കിള്ളിയാറിനെ ജനകീയ പങ്കാളിത്തത്തോടെ സംരക്ഷിക്കാനുള്ള മിഷന്റെ ഭാഗമായി ഇന്ന് കിള്ളിയാറൊഴുകുന്ന കരകളിലൂടെ മന്ത്രിമാരുടെ നേതൃത്വത്തില്‍ ജനകീയ യാത്ര സംഘടിപ്പിക്കും. 'പുഴയറിവ് ' എന്ന പേരില്‍ നടത്തുന്ന യാത്രകള്‍ക്ക് ധനകാര്യവകുപ്പ് മന്ത്രി ഡോ. ടി.എം തോമസ് ഐസക്കും ജലവിഭവ മന്ത്രി മാത്യു ടി. തോമസുമാണ് നേതൃത്വം നല്‍കുക.
രാവിലെ എട്ടിന് മന്ത്രി മാത്യൂ ടി. തോമസിന്റെ നേതൃത്വത്തില്‍ കിള്ളിയാറിന്റെ ഉത്ഭവ സ്ഥലമായ പനവൂര്‍ കരിഞ്ചാത്തിമൂലയില്‍ നിന്ന് ആരംഭിക്കുന്ന യാത്രയും ഡോ. ടി.എം തോമസ് ഐസക്കിന്റെ നേതൃത്വത്തില്‍ വഴയിലയില്‍ നിന്ന് ആരംഭിക്കുന്ന യാത്രയും പത്താം കല്ലില്‍ സംഗമിക്കും. കിള്ളിയാര്‍ മിഷന്‍ ചെയര്‍മാന്‍ ഡി.കെ മുരളി എം.എല്‍.എ, എം.എല്‍.എമാരായ സി. ദിവാകരന്‍, കെ.എസ് ശബരീനാഥ് എന്നിവരും ജനപ്രതിനിധികളും നാട്ടുകാരും പങ്കെടുക്കും.
ജലസംരക്ഷണത്തിന്റെ ആവശ്യകത ഓര്‍മപ്പെടുത്തുന്ന പാട്ടുകളുടെ അകമ്പടിയോടെയാവും യാത്ര. നാട്ടുകാര്‍ നാടന്‍ ഭക്ഷണങ്ങളൊരുക്കി യാത്രികരെ വരവേല്‍ക്കും. കിള്ളിയാറൊഴുകുന്ന പനവൂര്‍, ആനാട്, അരുവിക്കര, കരകുളം പഞ്ചായത്തുകളിലെയും നെടുമങ്ങാട് നഗരസഭയിലെയും ജനപ്രതിധിനികള്‍ യാത്രയില്‍ അണിചേരും. കിള്ളിയാറിന്റെ ശോച്യാവസ്ഥ ജനങ്ങളെ ബോധ്യപ്പെടുത്താനും ജനകീയ പങ്കാളിത്തത്തോടെ സംരക്ഷിക്കാനും ശുചീകരിക്കാനുമാണ് പുഴയറിവ് സംഘടിപ്പിച്ചിരിക്കുന്നതെന്ന് സമിതി കണ്‍വീനറും നെടുമങ്ങാട് ബ്ലോക്ക് പഞ്ചായത്ത് പ്രസിഡന്റുമായ ബി. ബിജു പറഞ്ഞു.
കിള്ളിയാര്‍ മിഷന്റെ നേതൃത്വത്തില്‍ കിള്ളിയാറൊരുമ എന്ന പേരില്‍ ഏപ്രില്‍ 14ന് ഏകദിന ശുചീകരണ യജ്ഞവും നടക്കും. കിള്ളിയാറിന്റെ ഉത്ഭവസ്ഥാനം മുതല്‍ പുഴയൊഴുകുന്ന 22 കിലോ മീറ്റര്‍ ദൂരം വൃത്തിയാക്കുകയാണ് ലക്ഷ്യം. കിള്ളിയാറിലേക്ക് വന്നുചേരുന്ന 31 തോടുകള്‍ സംരക്ഷിക്കുന്നതിന് വേണ്ടി 47 പ്രാദേശിക കിള്ളിയാര്‍ മിഷനുകള്‍ സ്ഥാപിച്ചിട്ടുണ്ട്. സമിതികളുടെ നേതൃത്വത്തില്‍ മുപ്പതിനായിരം പേര്‍ ദൗത്യത്തില്‍ പങ്കെടുക്കുമെന്നും സംഘാടകര്‍ അറിയിച്ചു.