ഹൈദരാബാദ്: കര്‍ഷകരെ കയറ്റി പോകുകയായിരുന്ന ട്രാക്ടര്‍ കനാലിലേക്ക് മറിഞ്ഞ് ഒന്‍പതുപേര്‍ മരിച്ചു. നല്‍ഗോണ്ട ജില്ലയിലെ വാഡിപെട്‌ല ഗ്രാമത്തിലായിരുന്നു അപകടം.
30 കര്‍ഷകരാണ് ട്രാക്ടറിലുണ്ടായിരുന്നത്. മുളക് പാടത്ത് വിളവെടുക്കാന്‍ പോകുകയായിരുന്നു കര്‍ഷകര്‍. ട്രാക്ടര്‍ ഓടിക്കുന്നതിനിടയില്‍ ഡ്രൈവര്‍ മൊബൈല്‍ ഫോണില്‍ സംസാരിച്ചുകൊണ്ടിരുന്നുവെന്നും ഇതിനിടയില്‍ നിയന്ത്രണം വിട്ട ട്രാക്ടര്‍ കനാലിലേക്ക് വീഴുകയായിരുന്നുവെന്നും രക്ഷപ്പെട്ടവര്‍ പറയുന്നു. മരിച്ചവരുടെ മൃതദേഹങ്ങള്‍ പുറത്തെടുത്തു. 15 പേരെ രക്ഷപ്പെടുത്തിയിട്ടുണ്ട്. രണ്ട് കുട്ടികളടക്കമുള്ള കാണാതായവര്‍ക്കുവേണ്ടി തിരച്ചില്‍ തുടരുകയാണ്.