കൊച്ചി: സമൂഹമാധ്യമങ്ങളിലൂടെ മതവികാരം വ്രണപ്പെടുത്തിയെന്ന പരാതിയില്‍ യുക്തിവാദ നേതാവ് ആരിഫ് ഹുസൈനെതിരെ പൊലിസ് കേസെടുത്തു. വിശ്വാസികളുടെ വികാരം വ്രണപ്പെടുത്തുന്നതും, വിദ്വേഷം പ്രചരിപ്പിക്കുന്നതുമായി പോസ്റ്റുകള്‍ പ്രചരിപ്പിച്ചെന്ന പരാതിയിലാണ് ഈരാറ്റുപേട്ട പൊലിസ് കേസെടുത്തത്. പരാതിയില്‍ അന്വേഷണം പുരോഗമിക്കുകയാണെന്ന് പൊലിസ് ഹൈക്കോടതിയെ അറിയിച്ചു. തൊട്ടുപിന്നാലെ പോസ്റ്റുകള്‍ നീക്കം ചെയ്യാമെന്ന് ആരിഫ് ഹുസൈന്‍ കോടതിയെ അറിയിച്ചു. 

കോട്ടയം ഈരാറ്റുപേട്ട സ്വദേശി എന്‍.എം നിയാസാണ് ആരിഫ് ഹുസൈനെതിരെ ഹൈക്കോടതിയെ സമീപിച്ചത്. സാമൂഹിക സ്പര്‍ധയുണ്ടാക്കുന്ന പോസ്റ്റുകള്‍ നീക്കം ചെയ്യാന്‍ കോടതി ഇടപെടണമെന്നായിരുന്നു ഹരജി. കേസില്‍ ഗുഗിള്‍, മെറ്റ എന്നിവരെയും കക്ഷി ചേര്‍ത്തിരുന്നു. 

ആരിഫ് ഹുസൈനെതിരെ കേസെടുക്കണമെന്ന് ആവശ്യപ്പെട്ട് പരാതിക്കാരന്‍ നേരത്തെ ഈരാറ്റുപേട്ട പൊലിസിലും, കോട്ടയം ജില്ല പൊലിസ് മേധാവിക്കും പരാതി നല്‍കിയിരുന്നു. ആരിഫിനെതിരെ ബിഎന്‍എസ് 153, 295 - എ വകുപ്പുകള്‍ പ്രകാരമാണ് ഇയാള്‍ക്കെതിരെ പൊലിസ് കേസെടുത്തിരിക്കുന്നത്. കേസ് നവംബര്‍ നാലിന് വീണ്ടും പരിഗണിക്കും.