ജിദ്ദ: സമ്മാനങ്ങള്‍ ലഭിച്ചിട്ടുണ്ടെന്ന് അറിയിച്ച് ബാങ്ക് അക്കൗണ്ട് വിവരങ്ങള്‍ ആവശ്യപ്പെട്ടിരുന്ന തട്ടിപ്പ് സംഘം ദമാമില്‍ പിടിയിലായി. വിവിധ സ്ഥാപനങ്ങളുടെ പേരിലാണ് സ്വദേശികളുമായും വിദേശികളുമായും ഫോണില്‍ ബന്ധപ്പെട്ടിരുന്നത്. ഇവര്‍ വാട്‌സ്ആപ്പില്‍ സന്ദേശങ്ങള്‍ അയക്കുകയും ചെയ്തിരുന്നു. ഏഴ് പാക്കിസ്താന്‍ പൗരന്മാരെയാണ് ദമാം പൊലിസ് അറസ്റ്റ് ചെയ്തത്.

സമ്മാനമായി വന്‍തുക അടിച്ചിട്ടുണ്ടെന്നും അവ ലഭിക്കാന്‍ വ്യക്തിഗത വിവരങ്ങളും പണവും അയച്ചുതരണമെന്ന് ആവശ്യപ്പെട്ടുമാണ് ഫോണ്‍ സന്ദേശങ്ങള്‍ അയക്കുന്നത്.

സ്വദേശികളും വിദേശികളും വ്യാപകമായി തട്ടിപ്പിനിരയായതോടെയാണ് പൊലിസ് അന്വേഷണം ഊര്‍ജിതമാക്കിയതും പ്രതികളെ വലയിലാക്കിയതും. വിവിധ വകുപ്പുകള്‍ സംയുക്തമായാണ് ഇവര്‍ക്കായി വല വീശിയിരുന്നതെന്ന് ദമാം പൊലിസ് വക്താവ് കേണല്‍ സിയാദ് അല്‍റഖതി അറിയിച്ചു. ഇവരില്‍ നിന്ന് നിരവധി ബാങ്ക് അക്കൗണ്ട് വിവരങ്ങളും ഇരകള്‍ പണം അയച്ചുകൊടുത്ത രേഖകളും വന്‍തുകയുടെ പ്രീപെയ്ഡ് കാര്‍ഡ് വിവരങ്ങളും പൊലിസ് പിടിച്ചെടുത്തിട്ടുണ്ട്.

ലുലു ഹൈപ്പര്‍മാര്‍ക്കറ്റ്, എസ്.ടി.സി തുടങ്ങിയ സ്ഥാപനങ്ങളുടെ പേരിലാണ് സഊദി അറേബ്യയില്‍ ഫോണ്‍ തട്ടിപ്പുകാര്‍ ഇരകളെ തേടിയിരുന്നത്. വന്‍തുക സമ്മാനം ലഭിച്ചിട്ടുണ്ടെന്നും അവ അയച്ചുതരാന്‍ വ്യക്തിഗത, ബാങ്ക് വിവരങ്ങള്‍ അയച്ചുതരണമെന്നാവശ്യപ്പെട്ട് വാട്‌സ്ആപ്പ് വഴി സന്ദേശമയക്കുകയും മൊബൈല്‍ഫോണില്‍ വിളിക്കുകയും ചെയ്യും. സംഭവം വ്യാപകമായതോടെ സര്‍ക്കാര്‍, അര്‍ധസര്‍ക്കാര്‍ ഏജന്‍സികള്‍ വിവിധ മാര്‍ഗങ്ങളിലൂടെ സ്വദേശികളിലും വിദേശികളിലും ബോധവത്കരണം നടത്തിവരികയായിരുന്നു. ഇത്തരം കോളുകള്‍ ലഭിക്കുകയാണെങ്കില്‍ ആ നമ്പറുകള്‍ 800825 എന്ന നമ്പറില്‍ അയച്ചുതരണമെന്ന് എസ്.ടി.സി ഉപയോക്താക്കള്‍ക്ക് സന്ദേശം അയച്ചിരുന്നു.