മാഡ്രിഡ്: അപരാജിതരായി 38 മത്സരങ്ങള്‍ പൂര്‍ത്തിയാക്കുന്ന ടീമെന്ന സ്പാനിഷ് റെക്കോര്‍ഡിനൊപ്പം ബാഴ്‌സലോണ എത്തിയ പോരാട്ടത്തില്‍ അവര്‍ 3-1ന് ലെഗാനസിനെ വീഴ്ത്തി. ഹാട്രിക്ക് ഗോളുകളുമായി സൂപ്പര്‍ താരം ലയണല്‍ മെസ്സി തിളങ്ങിയതും മത്സരത്തിന്റെ സവിശേഷതയായി.
സ്പാനിഷ് ലാ ലിഗ പോരാട്ടത്തില്‍ കിരീടമുറപ്പിച്ച് മുന്നേറുന്ന ബാഴ്‌സലോണ സ്വന്തം തട്ടകത്തിലാണ് പോരാട്ടം വിജയിച്ചത്. കളിയുടെ 27ാം മിനുട്ടില്‍ ലഭിച്ച ഫ്രീ കിക്ക് വലയിലാക്കി ഗോള്‍ വേട്ടയ്ക്ക് തുടക്കമിട്ട മെസ്സി അഞ്ച് മിനുട്ടിനുള്ളില്‍ 32ല്‍ രണ്ടാം ഗോളും നേടി. പിന്നീട് രണ്ടാം പകുതിയില്‍ ഒരു ഗോള്‍ ലെഗാനസ് മടക്കിയെങ്കിലും 87ാം മിനുട്ടില്‍ തന്റെ ഹാട്രിക്ക് പൂര്‍ത്തിയാക്കി മെസ്സി ബാഴ്‌സയുടെ വിജയം ഉറപ്പിച്ചു. മറ്റൊരു മത്സരത്തില്‍ ലെവാന്റെ 2-1ന് ലാസ് പല്‍മാസിനെ കീഴടക്കി.