മലപ്പുറം: മുന്‍ വര്‍ഷങ്ങളെ അപേക്ഷിച്ചു ജില്ലയിലെ കഞ്ചാവ് കേസുകളുടെ എണ്ണത്തില്‍ വന്‍ വര്‍ധനവ്. കഴിഞ്ഞ മൂന്നു മാസത്തിനിടെ 120 കിലോഗ്രാം കഞ്ചാവാണ് ജില്ലയില്‍ പിടികൂടിയത്. കഴിഞ്ഞ വര്‍ഷം ആകെ 251 കിലോഗ്രാമായിരുന്നു പിടിച്ചിരുന്നത്.
ഈ വര്‍ഷം വിവിധ കേസുകളില്‍ ഇതുവരെ 174 പേര്‍ അറസ്റ്റിലായി. കഴിഞ്ഞ വര്‍ഷം ജില്ലയില്‍ 922 കേസുകളാണ് രജിസ്റ്റര്‍ ചെയ്തിരുന്നത്. ഇതില്‍ 573 പേരാണ് പിടിയിലായത്. ഗ്രാമ, ഗരഭേദമന്യേ ജില്ലയില്‍ കഞ്ചാവ് മാഫിയ പിടിമുറുക്കിയിട്ടുണ്ട്. പിടിക്കപ്പെട്ടവയ്ക്കു പുറമേ നിയമത്തിന്റെ കണ്ണുവെട്ടിച്ചുള്ള വില്‍പന വേറെയും നടക്കുന്നുണ്ട്.
കവലകളും ബസ് സ്റ്റാന്‍ഡുകളും സ്‌കൂള്‍ പരിസരങ്ങളും കേന്ദ്രീകരിച്ചാണ് പ്രധാനമായും കച്ചവടം നടക്കുന്നത്. അസം, ഒഡിഷ സംസ്ഥാനങ്ങളില്‍നിന്നാണ് പ്രധാനമായും കഞ്ചാവ് ജില്ലയിലേക്കെത്തുന്നത്. കേരള-തമിഴ്‌നാട് അതിര്‍ത്തി ഗ്രാമങ്ങളില്‍നിന്നും ഇതു ജില്ലയിലേക്കു കൊണ്ടുവരുന്നുണ്ട്. ഇതര സംസ്ഥാനക്കാര്‍ നാട്ടില്‍നിന്നു വരുമ്പോള്‍ കഞ്ചാവ് കൊണ്ടുവരുന്നതും ഇവിടെ വില്‍ക്കുന്നതും പതിവാണ്.
പൊലിസും എക്‌സൈസ് ഉദ്യോഗസ്ഥരും പിടികൂടുന്നതു മിക്കതും രഹസ്യ വിവരത്തിന്റെ അടിസ്ഥാനത്തിലും അറസ്റ്റിലായവരില്‍നിന്നുള്ള വിവരപ്രകാരവുമാണ്. ഇതിന്റെ പലയിരട്ടി കഞ്ചാവ് ജില്ലയിലേക്ക് ഒഴുകുന്നതായാണ് കണക്കുകള്‍. മൂന്നു വര്‍ഷമായി കഞ്ചാവ് കേസുകളുടെ എണ്ണത്തില്‍ വലിയ വര്‍ധനവുണ്ടായതായി എക്‌സൈസ് അധികൃതര്‍ പറയുന്നു. കഞ്ചാവ് നട്ടുവളര്‍ത്തുന്ന കേസുകള്‍ അപൂര്‍വമായിരുന്നെങ്കിലും അതും ജില്ലയില്‍ വര്‍ധിച്ചുവരികയാണ്.
എക്‌സൈസിന്റെ ഒന്‍പത് റെയ്ഞ്ച് ഓഫിസുകളും സര്‍ക്കിള്‍ ഓഫിസുകളും മുഖേന പരിശോധന കര്‍ശനമാക്കിയിട്ടും കഞ്ചാവിന്റെ ഒഴുക്കിനു കുറവുണ്ടായിട്ടില്ല. നല്ലൊരു പങ്കും തീരദേശത്തേക്കാണ് എത്തുന്നതെന്നതും പ്രത്യേകതയാണ്. കഞ്ചാവെത്തിക്കുന്നതിനു സ്ത്രീകളെയും കുട്ടികളെയും കരിയര്‍മാരാക്കുന്ന പ്രവണതയും വര്‍ധിച്ചിട്ടുണ്ട്. കാറുകളില്‍ കഞ്ചാവ് കടത്തുമ്പോള്‍ സ്ത്രീയും കുട്ടിയുമുണ്ടെങ്കില്‍ പരിശോധനിയില്‍നിന്നു രക്ഷപ്പെടാനാകുമെന്നതാണ് കാരണം.
കഴിഞ്ഞ 26നു തിരൂരങ്ങാടി വെന്നിയൂരില്‍ ആന്ധ്രയില്‍നിന്നു കൊണ്ടുവന്ന 60 കിലോ കഞ്ചാവ് പിടികൂടിയപ്പോള്‍ ഈ സംഘത്തില്‍ 22കാരിയായ ആന്ധ്ര സ്വദേശിനിയുമുണ്ടായിരുന്നു. പിടികൂടുന്ന കഞ്ചാവ് ഒരു കിലോയില്‍ താഴെയാണെങ്കില്‍ വേഗത്തില്‍ ജാമ്യം ലഭിക്കുമെന്നതും യഥേഷ്ടമുള്ള കഞ്ചാവ് കടത്തിനു കാരണമാകുകയാണ്.