ബ്രസീലിയ: അഴിമതിക്കേസില്‍ തടവുശിക്ഷ വിധിക്കപ്പെട്ട ബ്രസീല്‍ മുന്‍ പ്രസിഡന്റ് ലുല ഡാ സില്‍വ കീഴടങ്ങി. വിധിയെ തുടര്‍ന്ന് സാവോ പോളോയിലെ സ്റ്റീല്‍ വര്‍ക്കേഴ്‌സ് ബില്‍ഡിങില്‍ നൂറുകണക്കിന് അനുയായികളുടെ സംരക്ഷണ വലയത്തില്‍ രണ്ട് ദിവസം കഴിഞ്ഞ ശേഷമാണ് ലുല പൊലിസിന് മുന്നില്‍ കീഴടങ്ങിയത്.

'കാര്‍വാഷ്' എന്ന പേരില്‍ കുപ്രസിദ്ധമായ അഴിമതിയാരോപണ കേസില്‍ 12 വര്‍ഷത്തെ ജയില്‍ ശിക്ഷയാണ് 72കാരനായ ലുലയ്ക്ക് കോടതി വിധിച്ചത്. വ്യാഴാഴ്ചയാണ് ലുലയെ അറസ്റ്റ് ചെയ്യാനുള്ള വാറണ്ട് പുറപ്പെടുവിച്ചത്.

അടുത്തുവരുന്ന തെരഞ്ഞെടുപ്പില്‍ നിന്നു തന്നെ അകറ്റി നിര്‍ത്താനാണ് ഇത്തരമൊരു കോടതി വിധിയെന്നും അതിനാല്‍ തന്നെ കീഴടിങ്ങില്ലെന്നും അറിയിച്ച് ശനിയാഴ്ച രാത്രി വരെ ലുല സ്റ്റീല്‍ വര്‍ക്കേഴ്‌സ് ബില്‍ഡിങില്‍ അനുയായികളുടെ സംരക്ഷണ വലയത്തില്‍ കഴിയുകയായിരുന്നു. കോടതി വിധിക്കെതിരെ ഐക്യരാഷ്ട്ര സംഘടനയുടെ മനുഷ്യാവകാശ കമ്മിറ്റിയില്‍ അപേക്ഷ സമര്‍പ്പിക്കുമെന്ന് ലുല അനുയായികളും അറിയിച്ചിരുന്നു.

ഒക്‌ടോബറില്‍ നടക്കാനിരിക്കുന്ന പ്രസിഡന്റ് തെരഞ്ഞെടുപ്പില്‍ വര്‍ക്കേഴ്‌സ് പാര്‍ട്ടി സ്ഥാനാര്‍ഥിയായി നാമനിര്‍ദേശം ചെയ്യപ്പെട്ട് പ്രചാരണത്തില്‍ ഏര്‍പ്പെട്ടിരിക്കെയാണ് ലുലക്കെതിരായി കോടതി വിധി വന്നത്. 2003 മുതല്‍ 2011 വരെ പ്രസിഡന്റായിരുന്ന ലുല ദശലക്ഷക്കണക്കിന് ബ്രസീലിയന്‍ ജനങ്ങളെ ദാരിദ്ര്യത്തില്‍ നിന്ന് മോചിപ്പിച്ച നേതാവായാണ് പ്രകീര്‍ത്തിക്കപ്പെടുന്നത്. വര്‍ക്കേഴ്‌സ് പാര്‍ട്ടി നേതാവും ജനസമ്മതനുമായ ലുലക്ക് തെരഞ്ഞെടുപ്പില്‍ മത്സരിക്കാനാകുമോ എന്നത് സംബന്ധിച്ച തീരുമാനം ഇലക്ടറല്‍ കോടതി കൈക്കൊള്ളും.