മാഡ്രിഡ്: സ്പാനിഷ് ലാ ലിഗയിലെ മാഡ്രിഡ് നാട്ടങ്കം സമനിലയില്‍ പിരിഞ്ഞു. റയല്‍ മാഡ്രിഡിന്റെ തട്ടകമായ സാന്റിയാഗോ ബെര്‍ണാബുവില്‍ അരങ്ങേറിയ ഡെര്‍ബി പോരാട്ടം 1-1 എന്നനിലയിലാണ് അവസാനിച്ചത്. 

ആദ്യ പകുതി ഗോള്‍രഹിതമായപ്പോള്‍ രണ്ടാം പകുതി തുടങ്ങി 53ാം മിനുട്ടില്‍ വല ചലിപ്പിച്ച് സൂപ്പര്‍ താരം ക്രിസ്റ്റ്യാനോ റൊണാള്‍ഡോ റയലിനെ മുന്നിലെത്തിച്ചു. എന്നാല്‍ അവരുടെ സന്തോഷത്തിന് നാല് മിനുട്ടിന്റെ ദൈര്‍ഘ്യമേ ഉണ്ടായിരുന്നുള്ളു. 57ാം മിനുട്ടില്‍ അന്റോയിന്‍ ഗ്രിസ്മാനിലൂടെ അത്‌ലറ്റിക്കോ സമനില പിടിക്കുകയായിരുന്നു.
മറ്റൊരു മത്സരത്തില്‍ റയല്‍ സോസിഡാഡ് സ്വന്തം തട്ടകത്തില്‍ തകര്‍പ്പന്‍ വിജയം സ്വന്തമാക്കി. മറുപടിയില്ലാത്ത അഞ്ച് ഗോളുകള്‍ക്ക് അവര്‍ ജിറോണയെ വീഴ്ത്തി.
31 കളികള്‍ പൂര്‍ത്തിയായപ്പോള്‍ കിരീടമുറപ്പിച്ച് മുന്നേറുന്ന ബാഴ്‌സലോണയ്ക്ക് 79 പോയിന്റുകള്‍. ഇത്രയും മത്സരങ്ങളില്‍ നിന്ന് 68 പോയിന്റുമായി അത്‌ലറ്റിക്കോ മാഡ്രിഡ് രണ്ടാം സ്ഥാനത്തും 65 പോയിന്റുമായി വലന്‍സിയ മൂന്നാം സ്ഥാനത്തും 64 പോയിന്റുമായി റയല്‍ മാഡ്രിഡ് നാലാം സ്ഥാനത്തും നില്‍ക്കുന്നു.
ചെല്‍സിയെ
കുരുക്കി വെസ്റ്റ് ഹാം
ലണ്ടന്‍: ഇംഗ്ലീഷ് പ്രീമിയര്‍ ലീഗ് പോരാട്ടത്തില്‍ ചെല്‍സിയെ അവരുടെ തട്ടകത്തില്‍ 1-1ന് സമനിലയില്‍ തളച്ച് വെസ്റ്റ് ഹാം യുനൈറ്റഡ്. ആദ്യ പകുതിയില്‍ ഒരു ഗോളിന് മുന്നിലെത്തിയ ശേഷമാണ് രണ്ടാം പകുതിയില്‍ ഗോള്‍ വഴങ്ങി ചെല്‍സി സ്വന്തം തട്ടകത്തില്‍ സമനിലയില്‍ കുരുങ്ങിയത്. വിജയത്തോടെ അവസാന നാലിലെത്താനുള്ള പ്രതീക്ഷ നിലനിര്‍ത്താനുള്ള അവസരവും നിലവിലെ ചാംപ്യന്‍മാര്‍ കളഞ്ഞുകുളിച്ചു. കളിയുടെ 36ാം മിനുട്ടില്‍ ആസ്പിലിക്വേറ്റയുടെ ഗോളിലാണ് ചെല്‍സി ലീഡെടുത്തത്. എന്നാല്‍ 73ാം മിനുട്ടില്‍ ജാവിയര്‍ ഹെര്‍ണാണ്ടസിന്റെ ഗോളില്‍ വെസ്റ്റ് ഹാം ചെല്‍സിയെ ഒപ്പം പിടിക്കുകയായിരുന്നു.